Þjóðhyllingar vígbúast og ætla að verja sitt fólk til síðasta manns

Þá hefir lögreglustjórinn í Reykjavík látið til skarar skríða gegn Pétri og skammt að bíða að frú Armþrúður fái líka að vappa svipugöngin á lögreglustöðinni og í réttarsalnum. Leiðin liggur sem sé frá Sögu upp til Hólmsheiðar. Pétur virðist borin orðræðusökum, að espa fáráðlinga til að viðhafa grimmdarlegt orðbrag í beinum útsendingum á útvarpsstöð nokkurri, sem er ekki boðleg orðræða né samtal. Á þessari útvarpsstöð þykir nokkuð sport, að laða fram tungutak galinna manna og kvenna um samkynhneygða, múslima, vinstrimenn, flóttamenn og ESB-sjúklinga. Stundum formæla brjálæðingarnir, sem hringja á útvarpsstöðina, hommum, þeldökkum, hælisleitendum og múhámeðstrúarmönnum svo heiftarlega að tækin bókstaflega brenna yfir af bölbænunum og neistaflugið stendur framan í þáttarstjórnandann af slíkum krafti að hárið á honum sviðnar af djöfulskapnum.

Nú geri ég ráð fyrir að þjóðhollir föðurlandsvinir og þjóðhyggjumenn láti ekki lögreglustjórann í Reykjavík gera aðsúg að þeirra fólki, slengi því öfugu á píningarbekkinn og láti dæma það í þrælkunarvinnu að Litla-Hrauni, eða á öðrum óþverrastað af sama tagi. Ég hygg að hinir þjóðhollu séu nú þegar farnir að safna liði, sem mæti með alvæpni til verjast yfirgangssömum sturlungum lögreglustöðvarinnar. Það er vitað að allir þjóðhollir þjóðhyggjumenn eiga sér birgðir af heyhvíslum, lurkum og skaröxum og að minnsta kosti einn þeirra býr svo vel að eiga kindabyssu, sem hann fékk í arf frá afa sínum sáluga. 

Það má búast við heilmiklu mannfalli ef þannig atvikast að lögreglan reyni innrás í útvarpsstöðina. Og lítið munu merarhjörtu manna lögreglustjóra megna gegn heyhvíslum og skaröxum hugdjarfra þjóðhyllinga, baráttugleði þeirra og hugsjón. Herdeild lögreglustjórns í Reykjavík er dæmd til að fara mjök halloka í þeim bardaga og yfrið nóg verður fyrir útfarastofurnar að gera næstu daga þar á eftir, því það verður að taka mál af þeim föllnu, smíða þeim kistur og moka yfir þá eftir að préstastéttin hefir gjört sínar skyldur við hina föllnu lögregludáta.

Pétur ákærður fyrir hatursorðræðu

Athugasemdir

[Helga Kristjánsdóttir, 23.11.2016 kl. 23:20]

Hvernig gastu hitt á "k" þar sem á að vera "G"..  Herdeild lögreglust-jórans í Reykjavík er dæmd til að fara mjög,,,,Ég er putta breið en klikka oftast á næsta við. ÚS er sannleiks útvarp og þar má alveg tjá sig um hvaðeina,án þess að misbjóða nokkrum. Hlustandi ársins 2015,er hommi og býr í Svíþjóð. Einn sá allra skemmtilegasti og svo heilsteyptur og greindur. B.KV. 

[Jón Valur Jensson, 23.11.2016 kl. 23:55]

Mjök er forníslenzka, Helga, fellur vel inn í samhengið.

En Jói þarf að laga sitthvað annað í stafsetningunni hér.

[Helga Kristjánsdóttir, 24.11.2016 kl. 02:47]

Já ég finn nær aldrei að stafsetningu enda alltaf að slá vitlaust eða sleppa,eins og gerist.-Hann nýtur forréttinda á sínu hlaði vegna frelsis mannanna við sína frelsis lind og erfitt að vera að þjarka um í þessum brögðótta glettnastíl 

Margir eiga erfitt í lífinu og þeir leita óhikað til péturs á Sögu sem er svo umburðarlindur..

[Jóhannes Ragnarsson, 24.11.2016 kl. 09:23]

Ég viðurkenni það fúslega, að ég hirði að öllu jöfnu lítið um frágang á pistlunum mínum, er fljótur að hripa þá niður og þá vilja stafsetningar-, innsláttar- og málfarsvillur fljóta með í ógáti. Það er ekki til fyrirmyndar.

En orðið ,,mjök" í stað ,,mjög" notaði ég að yfirlögðu ráði, þannig að þar er ekki um innsláttavillu að ræða.