Hvað skal gjöra við Markús

Það er nú það. Hvað ætli við getum gert fyrir hann Markús okkar hérna í Hæstarétti? Gerði karltsuskan sér til háðungar með þessu ekkisens fjármálavafstri? Er rétt að safna péníngum fyrir hann uppí það sem hann tapaði í Glitnishruninu? Úr vöndu er að ráða og fátt um fína drætti. Og allan þennan óratíma hefir Markús dæmt eins og óður maður, og sér ekki enn fyrir endann á þeirri rússíbanareið. Samt hefir hann mátt draga í land í sumum málum útaf sinni ektakvinnu, sem hefir að sögn verið svo ólánsöm að vera viðriðin einhver smáatriði málaferla sem ratað hafa alla leið inní Hæstarétt.

Trúlega rísa hinir refsiglöðu upp og krefjast ekki minna en hengingar á Markús, hinir hófsömu láta sér líklega nægja húðlát og gapastokk á Austurvelli. Svo eru náttúrlega aðrir sem nenna ekki einusinni að leiða hugann að svona smáskítlegum aukaatriðum og heimta að Krúsi haldi áfram að dæma einsog óður maður og eigi vonandi eftir að gefa mörgum delinkventum stimplaðan farmiða á Hraunið og Kvíabryggju. 

Fyrir ári síðan dæmdi Hæstiréttur í máli Máríu Borgargagns, sem gekk útá kröfu andskota hennar um lögbann á útgáfu æviminninga hennar. Fyrir það fyrsta þókti grandvörum mönnum nafn bókarinnar, ,,Flautað með físunni" með öllu óásættanlegt með tilliti til laga um klám og blygðunarlausa svívirðu. Í öðru lagi var að því fundið, að Borgargagnið virtist með orðum sínum í bókinni vera að hæla sér af sínu eigin lauslæti og væri talsmáti hennar á þann veg, að hún væri blátt áfram að hvetja kvennfólk til óviðunadi kynferðishegðunar og æsa það til saurlífis. Þá voru í þriðja lagi gerðar athugasemdir við umfjöllun Máríu Borgargagns um nafngreinda eiginmenn hennar, elskhuga, friðla og skyndikynnafola, á þeirri forsendu að óhjákvæmileg málaferli myndu fylgja öðrum eins dylgjum og ærumeiðingum ef bókin kæmi út. Og í fjórða lagi raupaði Borgargagnið um ítrekaðar kynvillutilraunir sínar af svo skammarlegu blygðunarleysi, að hárin myndu rísa og jafnvel detta af öllu sæmilega skikkanlegu fólki. Niðurstaða Markúsar og þeirra hinna í Hæstarétti var í sem fæstum orðum á þá leið, að útkoma bókarinnar, ,,Flautað með físunni" væri gjörsamlega bannfærð, en handritum og prentuðum eintökum og tölvum með efni bókarinnar innanborðs væri tryggilega eytt með eldi og brennisteini. Í þessu tilfelli barg Markús þjóðinni frá yfirvofandi menningarhruni og alþjóðlegri skömm með afdráttarlausum dómi sínum og fyrir það á þjóðin að endurgjalda honum með því að fyrirgefa honum dulítið péníngabrask í Glitni og segja Helga Selja og Kastljósi að grjóthalda kjafti og láta sér nægja að fjalla um fréttir af saumaklúbbum betri kvenna á höfuðborgarsvæðinu. 

Telur sig ekki hafa verið vanhæfan

Athugasemdir

[Ásthildur Cesil Þórðardóttir, 5.12.2016 kl. 21:47]

Flautað með físunni.  Hahahaha þvílík hugarsmíð ég get ekki lagst á koddan í kvöld vegna hláturs.  

[Jóhannes Ragnarsson, 5.12.2016 kl. 22:21]

Henni Máríu okkar Borgargagni bregst sjaldan andagiftin þegar hún þarf á henni að halda.

[Guðmundur Ásgeirsson, 5.12.2016 kl. 22:58]

Kjararáð hlýtur að finna lausn á þessu vandamáli.

[Anna Sigríður Guðmundsdóttir, 6.12.2016 kl. 00:05]

Fær Markús ekki kjarakaups-fallhlíf frá Kjararáði fyrir að vera ekki að svíkja þjóðfélagsþegnana áfram í Hæstarétti? Hvernig vegnar hans frú, lagaprófessornum núna í Háskólanum virta á Íslandi? Fær hún kannski líka kjararáðs-kauphallarspilavítis-fallhlíf fyrir að hætta að misbeita valdastöðu sinni?

Ég óska þeim hjónakornunum annars bara gleðilegra jóla og farsældar í framtíðinni. Öllum getur víst orðið eitthvað á í dómstóla-messunni, í lögmannastýrðu og svikulu stjórnsýslukerfi.

M.b.kv.

[Guðmundur Ásgeirsson, 6.12.2016 kl. 00:36]

Áhugavert væri að heyra koddahjalið hjá þeim hjónum.