Jóhannes Ragnarsson

12.2.2017 | 21:46

Barátta hennar

Frú Ingveldur er orðin löngu leið á að klöngrast langar leiðir í ríkið til að kaupa sér brjóstbæti. Þá hefir hún ekki minni viðbjóð á því að geta ekki farið í búð á kveldin og nóttinni eftir sömu vöru; sunnudagarnir eru svo kapítuli útaf fyrir sig. Kolbeinn Kolbeinsson, eiginmaður frú Ingveldar, er innilega sammála konu sinni um fráleitt fyrirkomulag áfengissölu, ekki síst kveld nætur og um helgar, sömuleiðis Máría Borgargagn, Indriði Handreður, Brynjar Vondalykt og Óli apaköttur. Öll eru þau sjálfstæðtt fólk, nema Kolbein, Borgargagnið og Handreðurinn, en þau eru sem kunnugt er framsóknarfól.

Þeir eru ekki ófáir mánudagsmorgnannir, sem frú Ingveldur og hennar vinir hafa mátt hefja vinnuvikuna á því að brjótast af hörku, marga kílómetra, gegnum ófærð, stórhríð, steypiregn, storm, fárviðri, til þess að sækja lífsbjörgina í eitthvert af einokunarútibú ríkisins. Stundum hafa þau verið við að bugast áður en áfangastað var náð; Kolbeinn kom til dæmis eitt sinn skríðandi á fjórum fótum inn ríkisgófið, klakabrynjaður og marghrakinn. Og hvað haldið þið að svínin, sem starfa fyrir ríkið við brennivínssölu hafi gert þegar þau komu auga þá hinn þjáða mann? Jú, þau ráku upp illkvittnishlátur og drógu hann á löppunum útúr ríkinu, útí gaddfrostið og stórhríðna, og spörkuðu í bakið á honum að skilnaði. Eftir þessa manndómsraun lá Kolbeinn rúmfastur um skeið með kalbletti á tánum óg á eyrunum.

Um árabil hefir frú Ingveldur háð baráttu gegn hinu hroðalega, ómannúðlega, einokunarfyrirkomulagi ríkisins á vínsölu. Mörgum sinnum hefur hún fengið unga auðnuleysingja, sem fyrir handvömm höfðu slæðst inná þing í það og það sinnið og gengdu því vafasama starfsheiti þingmaður, til leggja fram frumvörp til laga um brennivínssölu í matvöruverslunum og kjörbúðum. Eins og þekkt er, hefir baráttan um brennivínið verið löng og ströng; mikið þolinmæðisverk í stöðugum mótvindi. Loksins hafa nú skipast veður í lofti og brátt mun baráttu frú Invegldar, eiginmanns hennar, og þeirra vina, ljúka með fullnaðarsigri þeirra, sem mun gjöra þeim aðdrátt aðfanga auðveldan og umfram allt gleðilegan. Þaðan í frá mun Kolbeinn Kolbeinsson ekki þurfa að leggja sig stórfelldan lífsháska til að sækja sér afrétting.