Jóhannes Ragnarsson

16.3.2017 | 13:17

Hálf þjóðin grætur fall frú Ólafíu

Fall frú Ólafíu hefir vakið mikinn harm í Samfylkingunni, svo mikinn að jafnvel elstu menn þar innan dyra eru óhuggandi og táraflóðið með ólíkindum. Þá er frú Ólafía ákaft syrgð á ódáinsvöllum efri-millitéttar- og yfirstéttarkvenna og lífeyrissjóðalukkudýrin hafa ekki látið sitt eftir liggja í þessum ógurlega grátsöng. Einnig eru ihaldssubbur, sem eru ríkisstjórnarmegin í lífinu, heldur en ekki dapar vegna reiðarslags frú Ólafíu og fall hennar ofan af hanabjálka niður í skítugan kjallarann. En almennir launamenn og konur glotta að óförum Ólafíunnar og sumir hafa jafnvel leyt sér að hlægja upphátt og opinberlega að þeim.

Í bardaganum milli frú Ólafíu og Ragnars Þórs um formennskuna í VR studdi frú Ingveldur og hennar fólk allt sína konu og beittu sér óspart fyrir hennar hönd. Reyndar voru Kolbeinn og Máría Borgargagn deigari í sinni liðveislu því þau eru forhert framsóknarfólk sem elur þá von í barmi sínum að Ragnar Þór sé undirniðri góður framsóknarmaður, en það veit auðvitað enginn. Ástæðan fyrir stuðningi frú Ingveldar og þeirra hinna byggist á því að þau álíta Ragnar Þór almúgapakk enda lýsti Indriði Handriði því yfir að Ragnar væri illa skeindur götustrákur og óbermi. En Ólafía grand dama þó hún sé samfylkingartröll að innræti, hliðholl betri stéttum landsins og kapítalismanum. Ekkert er aftur á móti vitað hvar Ragnar stendur í þessum málum, nema hvað hann hlýtur að vera götustrákur og ódó fyrst hann hjólaði í jafn góða konu og frú Ólafía er.

Nú í hádeginu kom Kolbeinn þjótandi heim til sín og tilkynnti viðstöddum, flaumósa mjög, að grunur sé uppi um að mannhelvítið, þ.e. Ragnar Þór, sé undirförull kommúnisti þo svo hann hafi aldrei þorað að koma fram sem slíkur. Það væri á hreinu að enginn ærleg framsóknartaug bærðist innra með honum og væri óhætt að vara Villa framsóknarkall á Akranesi við þessum manni, ef mann skyldi kalla. Þar með snaraðist Máría Borgargagn ásamt Kolbeini á sveif með frú Ólafíu. Og á morgun verður frú Ólafía kynnt til leiks sem heiðursgestur í helgarsamkvæmi að heimili frú Ingveldar og Kolbeins.