Þá frú Ingveldi dreymdi Idi Amin

Já, já, Dónaldur Trump er einmitt soleiðis steggur sem lætur sér ekki muna um að sverja að allt andskotans kjaftæðið sem upp úr honum vellur sé háheilagur sannleikur þó að hvert barnið sjái að það sé haugalýgi frá rótum. Og að þessi endemisþorpari hafi verið kosinn þjóðhöfðingi af íbúum eins af stærstu ríkjum jarðarinnar ber slíkan vitnisburð um dómgreindina þar á bæ að fáu er við að jafna. Það er til einskis að yfirheyra sona kalla, allra síst undir eiði, því að lýgi er þeirra fag. Að vísu kusu Rússar yfir sig geggjaðan róna sem leyfði vinum og viðhlægendum sínum að stela því sem þeim þóknaðist af sameiginlegum eigum rússneski þjóðarinnar, en sá náungi hafði sér til afbötunar að vera bara róni, en engin slík afsökun er til fyrir fábjánahátt Dónald Trump sem fremur öll sín heimskupör og óhæfuverk alsgáður.

Einusinni á árum áður dreymdi frú Ingveldi að Idi karlinn Amin væri kominn upp í til hennar, öldungis berrassaður og í fantaformi. Þegar þetta gerðist átti frú Ingveldur aungann meydóm til í eigu sinni til að verja og siðferðisþreki hennar var þannig varið að henni þótti óþarfi að reka þennan ógurlega griðung úr rúminu. Hinsvegar hrökk Kolbeinn einginmaður frú Ingveldar upp við að kona hans var farin að orga eins og hún væri í miðri orgíu með Handreðnum, Borgargagninu og fleiri kunningjum þeirra hjóna. Að vonum varð Kolbeinn skelkaður því myrkt var í hjónaherberginu og sá ekki handa skil og varð honum í miklu fáti það fyrst fyrir að rísa upp í rúminu og rífa niðrum sig buxurnar. Um leið vaknaði frú Ingveldur og kveikti ljós og sá Kolbein gína yfir sig eins og brjálaðan öfugugga.

Og frú Ingveldur var fljót að hafa endaskipti á Kolbeini, sona nýbúin að hafa samskipti við Idi Amin í draumi, og tróð honum viðstöðulaust út um svefnherbergisgluggann og hafnaði Kolbeinn með náttbuxurnar á hælunum ofan í rennvotu moldarflagi þar sem hann veltist um nokkra hríð í náttmyrkrinu. Á þeirri stundu var Kolbeinn viss um að hann væri dauður (eiginkonan hefði myrt hann)og kominn til Helvítis. Um morguninn skjögraði Kolbeinn til hjónabandsráðgjafa og sagði honum frá ævintýri næturinnar, en hjónabandsráðgjafinn, sem var starfi sínum vaxinn, sprakk úr hlátri og hló og hló þangað til Kolbeinn sá að við svo búið mætti ekki standa og ráfaði út, gjörsamlega ráðvilltur og yfir hann færðist svartnættismyrkur. 

Trump: Ég er 100% tilbúinn