Nöfn hafa verið nefnd og særingamanns leitað

Að sjálfsögðu létu frú Ingveldur, Óli Apaköttur og Brynjar Vondalykt sig ekki vanta á fjölmennan fund Varðar um framboðsmál Sjálfstæðisflokksins. En í hliðarherbergi sátu Kolbeinn Kolbeinsson, Máría Borgargagn og Indriði Handreður, en þau heyra til gömlu Framsóknarmaddömunni, en fylgjast vel með aldlegum samherjum sínum í Valhöll. Nú er sem sé í spilunum, að höfðuðdjásn auðvald og arðráns, Sjálfstæðisflokkurinn, taki meirihlutann í Reykjavík í vor og ef eitthvað vantar upp á þá verði viðbótin sókt til Framsóknar því henni megi treysta til illra verka, sem best sannaðist á leiðinni til Hrunsins.

Auðvaldsflokkar leggja ævinlega mikið upp úr leiðtoga, sterka manninum, sem horfir með fyrirlitningu í kringum sig, lemur í borðið, segir andstæðingum að halda kjafti og niðurlægir þá með spotti og hroka. Í alvarlegum viðræðum í helgarsamkvæmum frú Ingveldar og Kolbeins hefir ítrekað komið fram að báðir aðiljar tilbúnir að stampa litlu framsóknarfraukunum í Reykjavík, sem gamall íhaldssteggur kallar æfinlega flugvallartítlur og vill með því gefa í skyn að þær séu til skaðræðis eins og veggjatítlur. Með sterka leiðtogann, borgarstjóraefni Sjálfstæðisflokksins, gegnir öðru máli, nú þegar er búið að hengja núverandi oddvita Flokksins upp á afturlöppunum, án þess að sterki leiðtoginn sé að öðru leyti fundinn.

Þeir sterku leiðtogar, sem komið hafa til umræðu í helgarsamkvæmum frú Ingveldar og Kolbeins, eru snillingar á borð við Ingu maddömu í Fokki fólsin, Gústaf Níelsson og sjálfan Óla Apakött. Einnig hafa Steingrímur J., Ingibjörg Sólrún og Óláfur Magnússon komið til álita ásamt Brynjari Vondulykt, Viggu Sleggju og Hannesi H. Gissurar. En hvurnig sem menn hafa velt hlutum fyrir sér, fram og til baka, svífur alltaf yfir vötnum hugmyndin um að vekja upp draug til að vera sterki leiðtoginn, þar koma ýmsir til greina þó einn tróni þar ævinlega yfir öðrum. Vissulega er málið viðkvæmt og vandmeðfarið, ljón í veginum og tappi í flöskuhálsinum. Og síðan er hræðslan við að Sjálfstæðisflokkurinn skíti í buxurnar einn ganginn enn í Reykjavík svo yfirþyrmandi að vandséð er að innan hans eða utan sé að finna þann rétta straum eður særingamann sem dugir ef vekja skal upp voldugan draug, sterka manninn.   

Vörður samþykkir leiðtogaprófkjör

Athugasemdir

[Aztec, 25.8.2017 kl. 17:21]

Ertu að gefa í skyn, Jóhannes, að fáir aðrir koma til greina sem oddviti Sjálfstæðisflokksins en ritstjóri vor í Hádegismóum? Að Reykjavík verði enn á ný Borg Davíðs? Að glataði sonurinn komi nú loksins heim aftur eftir miklar svaðilfarir og taki við stjórn þessarar borgar, sem hefur verið forarpyttur spillingar og skipulagsleysis allar götur síðan 1991?

[Jóhannes Ragnarsson, 25.8.2017 kl. 21:44]

Einhverstaðar stendur: ,,gleymdur tími er þér glataður þar til hann finnst" og nokkru síðar: ,,gleymdur tími er þér glataður jafnt ef hann finnst."

Ég er hræddur um að ,,glataði sonurinn" verði alveg jafn glataður ef hann finnst.