Eftir annasama daga var til viðbótar kukkað í te-ið frú Ingveldar

Það hefir ekki legið í láginni hjá, að Kolbeinn Kolbeinsson, sem er í beinu sambandi við gömlu karlægu Framsóknarmaddömuna í Fjósinu, hefði í hyggju að stampa Sveinbjörgu Birnu fyrir haustið. Að mati Kolbeins er Sveinbjörg Birna bæði klunnaleg og klauffeng í poletik og hefir komið óorði á Framsóknarflokkinn. Hinni framsóknargriðkunni í borgarstjórn ætlar Kolbeinn hugsanlega að leiða út á haustdögum, enda er hann búinn að fá nóg af henni líka. Honum þykir, sem eðlilegt er, þessar telpur full handgengnar Útvarpi Sögu og múslimahöturum til að forsvaranlegt sé að flíka þeim meir en orðið er. Þess ber að geta, að Kolbeinn er ekki múhámeðstrúarmaður enn sem komið er, en þegar hann er orðinn mjög drukkinn hefur hann heyrst tuldra myrir munni sér, ,,Allah er mikill og Múhámeð er spámaður hans."

Í sjálfu Framsóknarfjósinu hefir horft ófriðlega um hríð og dylgjur miklar manna í milli. Sem dæmi um óhamingju Framsóknarmanna þá leystu einhverjir þeirra mannýgasta tuddann í Fjósinu og létu hann elta Sigmund hérna Dávíð aftur á bak og áfram um þúfnakargann neðan við fjósið. Vað gamla Framsóknarmaddaman að skríða sjálf úr kör sinni til skakka leikinn og binda griðunginn á bás sinn. Fékk Kolbeinn þungar ákúrur frá Maddömunni því hún taldi að tuddinn hefði verið leystur að undirlagi hans. Á eftir drakk Kolbeinn Kolbeinsson sig augafullan og lýsti því yfir á Fjósbanum að réttast væri að byggja mosku í Reykjavík og loka Sigmund Dávíð og borgarstjórnartítlurnar þar inni til eilífðarnóns.

Á þessari stundu er óvíst um framboðsmál Framsóknar í Reykjavík fyrir næstu borgarstjórnarkosningar og þá einnig hvort flokkurinn verði yfirleitt með framboð þar. Þessa stundina skeggræða Kolbeinn og frú Ingveldur eiginkona hans, hvort ekki væri réttast að hjónin Máría Borgargagn og Indriði Handreður skipi tvö efstu sætin í Reykjavík næsta vor, það er að segja ef Framsóknarflokkurinn verður þá ekki úr sögunni, Fjósið hrunið, Fjóshaugurinn uppgróinn af illgresi og gamla Framsóknarmaddaman dauð. Stærsta málið þeirra frú Ingveldar og Kolbeins þessa stundina er þó að komast að því hvur kukkaði í teið frú Ingveldar síðastliðinn sunnudagsmorgun. Ef það glæpamál kemst upp er eins víst að sökudólgurinn á yfir höfði sér ægilega refsingu, jafnvel líflát, því þau hjónin eru sammála um að verknaðurinn sé óforskammaður að gerandinn eigi fullkomlega skilið að vera veginn með vopnum. 

Sveinbjörg Birna hættir í Framsókn

Athugasemdir

[Aztec, 25.8.2017 kl. 16:30]

Þegar ég var unglingur fyrir 45 árum síðan, þá hét ég því að frekar myndi ég láta drekkja mér í rotþró en að kjósa Framsókn, sem hafði það eina markmið að troða sér í ríkisstjórn eins og hver annar gauksungi og koma í veg fyrir framfarir. Þá þegar hafði ég lýst yfir einhverju svipað með Sjálfstæðisflokkinn (léti frekar berja mig lengi og ákaft með gaddakylfum). Löngu síðar bættust Samfylkingin og VG á listann yfir ókjörgenga flokka.

Þennan sorna eið hef ég virt alla ævi, þangað til ég kaus Sveinbjörgu fyrir þrem árum, enda sammála henni að það ætti að vera lýðræði í borginni. Mig sveið það þó að hún skyldi vera tengd þessum flokki. Nú þegar hún hefur yfirgefið framsóknarruslahauginn, þá hefur sál mín fengið aflát. Ef hún býður sig fram á næsta ári, þá mun ég kjósa hana eða þann flokk sem hún gengur í.

Ég veit, að margt fólk myndi vilja kjósa Íhaldsflokkinn bara til að koma Degi og Jihadistunum fyrir kattarnef, fólk sem kaus skiljanlega ekki þann flokk meðan Halldór var oddviti. Hins vegar virkar sú stefna ekki alltaf og er eyðileggjandi fyrir samvizkuna. T.d. í síðustu Alþingiskosningum datt mér ekki í hug að kjósa sjöflokkinn, en kaus þess í stað flokk sem ég vissi fyrirfram að myndi ekki komast á þing. Og hef sofið svefni hinna réttlátu síðan.

- Pétur D.