,,Hvernig við urðum poletiskir auðnuleysingjar og vanmetagemlingar"

Ekki er nú amalegt fyrir Wintrisflokkinn að fá flugvallarvin og moskuandstæðing í framboð fyrir sig, - það er hreint út sagt milljon (í Totólakrónum og aurum). Að visu er Wintrisflokkurinn fáránlegur flokkur, það er ekki einusinni hægt að hafa gaman að honum því skemmtanagildi hans er núll og nix, og sprottinn upp úr axarsköftum stofnanda hans, bóndans frækna að Hrafnabjörgum. Það er sem sé vandséð að lægra hafi misheppnaðir stjórnmálafúskarar komist í að stofna nýja flokka en einmitt með stofnun Wintrisflokksins.

En hvar ætli hún Sveinbjörg sé niðurkomin, hinn flugvallarvinurinn og moskuandstæðingurinn? Hún hlýtur að dúkka fljótlega upp sem oddviti Wintris í einhverju kjördæmi áður en yfir lýkur. Vorar vonir standa allar til þess. Hins vegar er hálf druslulegt af wintrishugsjónafullu fólki að vera einugis flugvallarvinir; af hverju eru það ekki líka orustuvallavinir?, fótboltavallarvinir?, skeiðvallarvinir? Og hvurnig í fjáranum stendur á að Wintrisingar eru jafn miklir hundahreinsunarandstæðingar og getnaðarvaraandstæðingar eins og moskuandstæðingar?

Í dag fékk ég í hendur dálítinn bækling eftir nafna minn Birkiland, útgefinn af honum sjálfum. Eins og þeir sem eitthvað hafa kynnt sér rit Birkilands hafa eflaust tekið eftir, þá kenndi kallanginn öllu og öllum öðrum um lífsólán sitt en sér sjálfum. Wintrisflokkurinn, og þá ekki síst stofnandi hans, hafa tekið þessa heimspeki Birkilands traustataki og gert að sinni; ólán wintrista er ekki þeim sjálfum að kenna, neineinei, öðru nær. Þett ólán er allt RÚV, óþverrum í fjölmiðlungastétt, óþverrum í Framsóknarflokknum og fjölmenningaróþverrum að kenna. Undirtitill ævisögu Birkilands var og er: ,,hvernig ég varð auðnuleysingi; samsvarandi undirtitill flokks Wintrisinga er að sjálfsögðu: ,,hvernig við urðum poletiskir auðnuleysingjar og vanmetagemlingar." 

Guðfinna leiðir í Reykjavík norður