Jóhannes Ragnarsson

24.1.2018 | 17:04

Maður Guðs og lifandi

Það er við hæfi, að þeir félagarnir Árni Sigfússon og Unitedur Sílíkóns yfirgefi Suðurnesin saman, verði samferða með ,,slitna brynju, sundrað sverð og syndagjöld" eins og skáldmennið sagði. Vafalaust verður þungu fargi létt af Reyknesingum þegar þeir horfa á efir þeim félögum og vita að þeir eru alfarnir og koma ekki meir. Á móti kemur svo spurningin, hvar eiga vondir að vera, og þá vandast málið heldur betur, því aunginn vill fá þá Árna og Unitedinn í sitt sveitarfélag. - Við gætum alveg eins tekið við Drakúla og Frankenstein, tvíelleftum, sagði fróm kona á landsbygðinni þegar hún var spurð hvort hún vildi Árna og U. Sílíkón í götuna hjá sér.

Við brotthlaup Árna af Suðurnesjum vekur sannarlega mesta athygli, að karlinn hefir verið 30 árum of lengi í pólitík, því þörfin á náungum af þessu kalíberi í stjórnmál er nákvæmlega aungin. Og fólki verður á þessum tímamótum hugsað með ósviknum hryllingi til allra þessara 30 ára kálfa sem Sjálfstæðisflokkurinn hefir troðið upp á samfélagið með ýmsum einkennilegum afleiðingum.

Svo er heldur ekki loku fyrir það skotið, að Árni fari í framboð annarsstaðar, fyrst vanþakklátir Suðurnesjamenn vilja ekkert með hann hafa lengur. Og Unitedur Sílíkón gæti farið í framboð líka. Árni gæti sem best boðið sig fram fyrir Samfylkinguna eða Pírata í Reykjavík og Steingrímur J. kann eflaust ráð til að koma honum Sílíkón fyrir í góðu sæti hjá VG; VG hefir nefnilega góða reynslu af að hafa Bakkasílíkón á lista hjá sér fyrir norðan land; og öll blessuð kolin sem Bakkasílíkón brennir, ja maður guðs og lifandi!