Nú er frú Ingveldur sorgmædd og reið; en huggunin er þó handan við hornið

Í dag eru frú Ingveldur og hennar fólk mjög reið stjórnendum Reykjavíkurborgar fyrir að hafa gjörg þjónustusamning við Samtökin 78, en frú Ingveldur hafði fyrir sína hönd og vina sinna sókt um að taka að sér sambærileg fræðslustörf við grunn- og leikskóla borgarinnar og Samtökin 78 vóru ráðin til. Til að gera fræðsludeild sína þverfaglegri til kynlegrar fræðslu höfðu þau sæmdarhjón, frú Ingveldur og Kolbeinn, ásamt Brynjari Vondulykt, Óla Apaketti, Máríu Borgargagni og Indriða Handreði, ráðið sérfræðingana Gylfa Viðar og Jón Val til liðs við sig til að kenna börnum hinn eina hreina sannleik um ógnir kynlífsins.

Frú Ingveldur og þau hin hugga sig þó við, að þau muni áreiðanlega hreppa umrætt fræðslustarf næsta ár, þegar búið verður að sópa kjánahjörð Dags B. Ekkerts niður í holræsið og í gegnum klóakhreinsibúnað borgarinnar. Þegar Viðar Guðjohnsen verður orðinn borgarstjóri, því hann verður næsti borgarstjóri Reykjavíkur, er næsta víst að hann ráði vini sína, frú Ingveldi og hennar úrvarlshóp, til að hrekja allar kynvilluhugmyndir út úr hausnum á skólakrökkunum og gera þau á ný að venjulegu fólki. Annars er Eyþór Arnalds í miklu afhaldi hjá frú Ingveldi, því hún getur aldrei borið nógsamlegt lofsorð á þann pena pilt og vill allt eins fá hann fyrir borgarstjóra eins og Viðar. Þess vegna hefir frú Ingveldur borið fram þá hugmynd, að Eyþór verði bogarstjóri og búið verði til nýtt embætti varaborgarstjóra, sem Viðar verði ráðinn til að þjóna.

Já, það er hugur í sjálfstæðismönnum í Reykjavík þessa dagana. Þeir eru nefnilega orðnir meir en vissir um, að núverandi borgarstjórnarmeirihluti sé búinn að gera svo hressilega í buxurnar, að af tvennu illu muni meirihluti Reykvíkinga kjósa Sjálfstæðisflokkinn í vor. Og vissulega lítur borgarstjórnarklan Dags B. orðið ansi ánalega út og mun auðveldara nú en áður að telja kjósendum trú um að þar fari eintómir heilalausir blábjánar, sem séu með heimskulegum tiltektum sínum langt komnir með að eyðileggja höfuðborgina og gera hana að almennu athhlægi, utan lands sem innan.

Samið um hinsegin fræðslu í leikskólum