Heimur versnandi fer og brátt verða allir aumingjar

Svo eru og forn sannindi að á misjöfnu þrífist börnin best. Og það eru svo sannarlega orð að sönnu. Í dag virðist af sá siður að rassskella krakkaafmánirnar ef þær gera eitthvað af sér þrátt fyrir að vitur maður hafi sagt, að ,,sá sem sparar vöndinn hatar son sinn en þann sem hann refsar elskar hann." Það er til dæmis borðliggjandi að eitthvað hefir vöndurinn verið sparaður á ráðherragægsnin atarna þegar þau voru að alast upp, því það fólk hagar sér líkast óöguðum óknyttaormum.  

Og krakkasvín á að reka í vinnu strax upp úr átta ára aldri. Það á að láta þau djöflast í fiskvinnu frá sex á morgnanna til tólf á kvöldin, helst alla daga vikunnar, elligar leyfa þeim að glíma við að handgrafa tveggjametra djúpa skurði með einföldum malarskóflum. Sjálfsagt er að nota börn til að þrífa lýsistanka og aðra óþrifalega staði, fyrir nú utan hvað krakkar hafa gott af að vera á togurum yfir háannatímann.

En þetta er víst allt bannað, því nútímarolur hafa það að markmiði að gera alla að aumingjum með hor og slef fyrir árið 2030. Bara það eitt að skipa krakkaskratta að þrífa klósettskálina heima hjá sér gæti kostað þann sem skipar átta ára fangelsi með tilheyrandi harðræði. Það var átakanlegt að sjá lögregluþjónana leiða móðurina, sem sló gelgjuna dóttur sína utanundir fyrir óþverra kjaftbrúk, út í lögreglubílinn, sem síðan flutti hana að dyrum fangelsisins þar sem hún hefir hafst við síðan og á eftir að hýrast næstu fjégur árin. Í gamla daga vóru allir farnir að drekka brennivín og liggja í því, eins og það var kallað, snemma á barnaskólaaldri, enda urðu þá allir að mönnum. 

70 börn á ári slasast við vinnu