Þá var öldin önnur, en nú er allt fyrir bí

Þá var öldin önnur þegar Stjörnusýslumaðurinn Stones ríkti í Árnessýslu, um þær mundir var aungvum manni hleypt í neinn bévítis jólamat eða annað í þeim dúr; menn vóru sem sé látnir vinna fyrir kaupinu sínu. Í tíð Stjörnusýslumannsins fólst jólaandinn á lögreglustöðinni ekki í jólatré úti í horni. Að vísu keypti Stjörnusýslumaðurinn jólatré, sem hann notaði einungis sem vönd til að hýða lögregluþjónana og þá glæpamenn sem lögregluþjónarnir viðuðu að lögreglustöðinni. En nú er öll góð regla fyrir bí í Árnessýslu og Stjörnusýslumaðurinn farinn í útlegð á Suðurnes; hann var nefnilega fluttur hreppaflutningi millum héraða, það var farið um Krýsuvík með hann, og honum holað niður hjá villumönnum og verstu djöflum.

Á dögum Stjörnsýslumannsins í Árnessýslu var lögreglumönnum á vakt borin ýsa á aðfangadagskvöld, stundum saltaður steinbítur eða saltkeila, og margarín í viðbit með brauðskorpunum. Af sona fæði varð lögreglan þar um slóðir sterk og árásargjörn og flaug fyrirvaralaust á glæpamenn á götum Selfoss eða uppi á Flúðum, en á Flúðum hefir jafnan verið val óeirðaseggja og brotamanna. Ef lögregluþrjótar reyndu að snúa út úr vilja yfirboðarans með því að laumast af vakt til að éta heima hjá sér elti Stjörnusýslumaðurinn þá inn í stofu og dró þá frá veisluborðinu á hárinu og fór með þá á stöðina. Það var aungin andskotans elsku mamma með það.

Eftir að Stjörnusýslumaðurinn var gerður að hálfgildings niðursetningi vestur á Reykjanesi er allur vindur úr honum. Jú, karlinn klæðir sig í lúðrasveitarbúninginn á morgnanna og sveimar með veggjum eins og geltur fressköttur það sem eftir lifir dag og er horfinn í bólið upp úr klukkan sex á kvöldin. Á meðan Stjörnusýslumaðurinn hrýtur eins og kornabarn í vöggu, alla liðlanga nóttina, fara hinir alræmdu glæpamenn á Suðurnesjum á stjá og láta greipar sópa, rota og myrða, án þess nokkur geri athugasemdir við háttarlag þeirra.   

Reyna að hleypa fólki heim í jólamatinn