Jóhannes Ragnarsson

15.2.2019 | 19:36

Lágt lagst í vesaldóm og hraksmán

Í stað þess að fara að ráði Kristins Hrafnssonar og siga lögreglunni á legáta Trumps, Pompeo nokkurn, sem sagður er utanríkisráðherra USA, og handtaka hann, skreið hún fyrir honum í ráðherrabústaðnum við Tjarnagötu eins og undirgefinn smjaðrari, þess albúin að þiggja einhverja mola úr klóm vargsins. Þar sem ráðherrabústaðurinn stendur nú stóð áður íslenskur torfbær, Melkot, sem sannarlega er fyrirmyndin af Brekkukoti og þar bjó hann Björn okkar í Brekkukoti, sem aldrei hefði skriðið eins og rotta fyrir borgarastétt og auðvaldi, allrasíst fyrir óþokka eins og Pompeo þessum.

En Katrín er ekki af sama standi og Björn í Brekkukoti; hún er af stétt Gúðmúndsens kaupmanns og ritstjóra Foldarinnar og trúlega náskyld því fólki, og að sama skapi er hún óskyld alþýðu manna, verkafólki og öðrum þeim er haldið hafa aðlinum uppi með striti og lágum launum. Þó hefir gráglettni örlaganna hagað því svo til, að Katrín hefur borist í ráðherrastóla fyrir tilstilli pólitískra loddara og óbótamanna, sem af meðfæddum slóttugheitum og óheiðarleika notfærðu sér verkafólk og annað alþýðufólk til að komast til mannvirðinga í stjórnsýslunni. Er til of mikils mælst að boðflennur og viðrinisskoffín hafi sig á brott úr híbýlum íslenskrar alþýðu?

Já, það er vafamál að nokkur stjónmálamaður, íslenskur, hafi lagst lægra í pólitískum vesaldómi og hraksmán en Katrín þessi og í dag toppaði hún sjálfa sig á einkar kauðskan og ógeðfelldan hátt. Að flaðra eins og barin hundur upp um amrískt sluddmenni af verstu tegund og hoppa kringum hann að hætti feitra og undirgefinna þræla er stærri biti en hægt er að þola. Beinast liggur við að Katrín segi tafarlaust af sér og láti ekki sjá sig nálægt stjórnmálum meir, eða hún flytji sig til sinnar stéttar, ásamt hyski sínu, Stengrími, Álfheiði og Svavarsfjölskyldunni, og gangi formlega í Sjálfstæðisflokkinn og eyði þar pólitískum dögum sínum við auðvald og arðrán ásamt með skyldugum þjófagróða á daginn og grilluðum humar og hvítvíni á kvöldin.