Hvunær stelur þingmaður kílómetra? Og hvunær er hann fífl?

Þórhildur Sunna má þakka fyrir að hafa bara fengið almenna ofanígjöf frá vel siðaðri nefnd í staðinn fyrir að forseti alþingis flengdi hana opiberlega í þingsalnum að öllum þingmönnum og varaþingmönnum viðstöddum, eins og til stóð þar til siðaða nefndin felldi dóm sinn. Þórhildur Sunna var nefnilega dónaleg í garð Ásmundar þingmanns Sjálfstæðisflokksins og svívirti í leiðinni Sjálfstæðisflokkinn meir en þolað verður. Það sér hver maður sjálfur, að telputetur, sem víkur illu að þingmanni Sjálfstæðisflokksins, dylgjar um hann í fjölmiðli eins og væri hann óseðjandi þjófur, hún hefir líka þjófkennt Sjálfstæðisflokkin og Stengrím forseta og það nær auðvitað aungri átt.

Ef Þórhildur Sunna hefði afturámóti haldið því fram að einhver tiltekinn þingmaður Pírata lægi undir rökstuddum grun um að vera þjófur og ræningi, hefði málið snúið allt öðruvísi við. Þá hefðu siðaða nefndin og þingmenn lokið lofsorði á Þórhildi Sunnu fyrir einlægni, réttsýni og sannsögli og Stengrímur forseti hefði tekið hna á knér sér, hvar hann sat í forsetastólnum, og dillað henni og kitlað hana undir hökunni. Það er nefnilega ekki það sama Ásmundur ökumaður og einhver bölvaður skítaklepri frá Pírötum.

Annars er þessi pírataselskapur allrar athygli verður, ekki síst þegar brogaða greindarvísitölu ber á góma á mannamótum. Það er til dæmis almælt að knáir liðsmenn Sjálfstæðisflokksins álíti Pírataflokkin ámátlegt samsafn fáráðlinga og heimskingja,sem best væri geymt inni á hæli þar sem þeir væru alminnilegu fólki ekki til skapraunar. Þá telja Sjálfstæðisflokksmenn, að þeir eigi öll atkvæði sem Pírötum eru greidd, hvert eitt og einasta með tölu. Frá þeirra bæjardyrum séð ræður meinlegur miskilningur því að kjósendur, einkum skólabörn, kasti atkvæðum sínum á fíflagang og galskap eins og Pírata, því oftar en ekki elski þetta fólk sjálfstæðisstefnuna þó það glepjist, í mótþróakasti, að kjósa heimskulegan barnaskap.  

  

Siðanefnd endurskoði niðurstöðuna