Að hefnist þeim er svíkur sína huldumey

Í dag er hátíðardagur hjá pólitísku vandræðafólki þessa lands. Undanfarið hafa liðsmenn Samfylkingarinnar vaknað hvurn morgun í sælurúsi og votri brók eftir blauta drauma næturinnar um nálgun innlimunnar í ESB eftir samþykkt þriðja orkupakkans; sama ástand hefir glatt landsölumenn og andlega aumingja annarra flokka á Íslandi; ,,selja land, grafa bein" eru enn þann dag í dag einkunarorð þessa ólánsfólks. Meira að segja allmargir liðsmenn hinnar óburðugu hugmyndar um stofnun ,,Sósíalistaflokks Íslands" eru hoppandi kátir með framvindu mála hjá Bjranaben, Gulla a. og Stengrími Joð, því þeim finnst alveg tilvalið að selja Ísland, auðlindir þess og orku auðvaldbákninu ESB. Já, kæru landsmenn, það eru þrifagemlingar og lukkuriddarar, sem við höfum valið okkur til löggjafastarfa á Alþingi.

Eins og allt er í pottinn búið, þá er einstaklega tilvalið og viðeigandi að það séu endemin í Flokkseigendafélagi VG sem draga vagninn í orkupakkaferðalaginu til móts við auðvald og arðræningjastóð Evrópusambandsins. Í eina tíð nudduðu Svavar, Stengrímur og Álfheiður sér ákaflega utan í róttæk skáld og sungu stundum í kenndiríi kvæði eftir Guðmund Böðvarsson og Þorstein Valdimarsson á borð við ,,Fygld", ,,Völuvísu" og ,,Þú veist í hjarta þér."
Sjáið þið ekki fyrir ykkur í anda þau Katrínu, Stengrím, Álfheiði og Swabbafjölskylduna öskra af innlifun, svona eins og þegar Pétur Þríhross var að orga sálma heima hjá sér við organundirleik sjálfs sín, texta sem koma fyrir eftirfarandi ljóðlínum:

,,Ef að illar vættir inn um myrkragættir bjóða svikasættir svo sem löngum ber við í heimi hér, þá er ei þörf að velja: þú mátt aldrei selja það úr hendi þér."
,,og gleymdu því ei: að hefnist þeim er svíkur sína huldumey, honum verður erfiður dauðinn."
,,Þú veist í hjarta þér kvað vindurinn, að vegur drottnarans er ekki þinn, heldur þar sem gróandaþytur fer og menn þerra svitann af enni sér, og tár af kinn."

Í dag nudda smámennin í VG sér utan í vini Miltons Friedmans og Hannesar Hólmsteins, stórauðvaldið á Vesturlöndum, ESB, USA og NATO og hefir tekist með því að reisa sjálfum sér þá níðstöng sem þeim hæfir. Hitt er svo aftur spurning hvort þessu drasli verður erfiður dauðinn, eða hvort þau skilja við með nafn Mammons á vörunum.   

Greiða atkvæði um orkupakkann