Brátt bætast hvítvíns- og bjórtjarnir við ferðaflóruna

Úrkynjuninni og afkáraskapnum í ferðaþjónustu á Íslandi eru aungin takmörk sett. Þetta er allt eins og bandvitlaust vitfirringahæli þar sem sá vinnur sem stelur mest og brýtur flest á starfsfólkinu. Einn ferðaþjónustubóndann tóku þrælar hans og aflífuðu í mógröf einn gamalli þar sem siður hefir verið að kasta í hundshræjum; það fór dálítið fyrir þeim kalli og Birni hérna Haraldssyni frá Öxl í Breiðuvíkurhreppi á Snæfellsnesi.

Nú, þessi fyrirleitlega fjallabaðavitleysa þeirra þarna í Þjórsárdal er nú bara ekkert í fáráðlíngshætti miðað við hvítvíns- og bjórtjarnirnar sem þeir ætla að setja upp í Húnavatnssýslu. Í hvítvísntjörnunum er áætlað að hafa lifandi humar í hudraða- eða þúsundatali, en í bjórpollunum verða smokkasjálfsalar og salernispappír. Og til að kóróna meistaraverkið hafa Húnvetningar látið hanna og smíða ekta, alvöru gullklósett, við hvað starfar skeinismaður af holdi og blóði til að þurrka og fægja botninn á gullrössunum, sem kaupa sér aðgang að hvítvíns- og bjórtjörnunum.

Þá hefir komið upp góð hugmynd, þess efnis, að útbúinn verði lækur, sona lítill og nettur bæjarlækur, þar sem alvöru vodka frá Stalíni í Rússlandi mun renna í lygnum straum, ja eitthvað út í buskann. Mér er sem ég sjái nokkra valinkunna samferðarmenn mína, sem nú eru dyggilega burtsofnaðir frá þessum heimi, liggja á þeim lækjarbakka og drekka. En því miður verður það varla þeirra að tæma vodkalækinn; aftur á móti er viðbúið að eitthvert skoffínamor muni teygja lopann þar á bökkunum og vonandi drekka sig í hel sem fyrst. Svoddan ódáma þekkjum vér ekki né umberum. zzzz  

Fjallaböð í Þjórsárdal í augsýn