Jóhannes Ragnarsson

4.12.2019 | 12:28

Í hinum földu póstum upplýsarans sannast sakleysi Samherjanna

Jæja, þar kom að því að Samherjarnir sönnuðu sakleysi sitt í Namibíumálinu. Hann nafni minn, Jóhannes Stefánsson, handvaldi nefnilega upplýsingar í Wíkílíksið og helga Seljan, lét umræddum pörupiltum einungis í té 42 prósent tölvupósta sinna. Jamm og já. Í hinum 58 prósentunum, sem Jóhannes úpplýsari sendi ekki kemur fram skýrt sakleysi Samherjanna,- eða hvað? Ljóti bévítis þorparinn og óþokkinn þessi upplýsaraskratti, sem og Seljan og Wíkílíks, Stundina tekur ekki að telja með.

Nú fá Wíkílíks og Helgi Seljan ugglaust afhent þessi 58 prósent sem upp á vantaði beint frá Samherjunum, Stjánajúl og Stenngrími Johoð. Og þá verður virkilega kátt í höllinni, því þegar hinir földu póstar birtast almenningi fær hvur maður séð að Samherji hefir aldregi mútað neinum, aungva pénínga þvegið og ekki leikið á neinn.

Svo verður þessum Jóhannesi uppljóstrara stungið í steininn, ekki bara í Namibíu heldur á Íslandi líka; enn fremur verður Helga Seljan gert að sitja í gæsluvarðhaldi á Hrauninu til æviloka og skiptir þá aungvu máli hvað hann verður gamall; hvurt hann verður hundrað ára, tvöhundruð ára eða þrjúhundruð ára, inni skal hann sitja og skammast sín og iðrast upp á hvurn dag, það verður nefnilega séð til þess. Eflaust verða fleiri illræðiskvikindi tekin föst fyrir glæpinn sem framinn hefir verið á Samherjunum og embættuð með það fyrir augum að ekkert íllt muni af þeim leiða framvegis.