Útlitið er sannarlega svart í Evrovisionmálum Íslendinga

Nú jæja, og eru í þriðja sæti? Verra gæti það verið. Samt þarf aungvann að undra þókt Ísland, með þessa hroðalegu lagleysu, verði lang-neðst, þegar upp verður staðið í vor, ef ekki verður búið að slá þessa vitleysu af út af kórónuvírúsnum. Mér sagði maður, grandvar og sannsögull, að framlag Íslands í Júróvísíjón 2020 verði rekið úr keppninni vegna ótrúlegra lélegheita. Þessi maður sagði enn fremur, að hann hefði dreymt að hann væri á úrslitakvöldinu, sem var í gærkveldi, og allt í einu hefði sjálfur Erki-Djöfullinn stormað inn á sviðið með vígtennta drýsildjöfla í eftirdragi og hefði þessi þokkafénaður sópað framlagi Íslands ofan í hlandkopp, sem Erki-Djöfulinn hafi í annarri hendi sinni.

Þó ekki blási byrlega um stund, þá skal aunginn æðrast og væri gott ef framlagi Íslands til júrókeppninnar verði vísað á bug og það gjört brottrækt og Ísland þannig fríað við að gjöra sér einn ganginn enn til stórskammar á erlendum vettvangi. Og víkjum nú að öðru og alvarlegra málefni:

Kolbeinn Kolbeinsson skrifstofustjóri og framsóknarmaður hefir greinst með kórónuveiruna og varpaði frú Ingveldur honum samstundis inn í miðstöðvarkompuna og ljóst var að hann væri hættulega sjúkur maður. Þetta er svo sem ekki í fyrsta skipti sem Kolbeinn hefir fengið drepsótt, því hann lá lengi í hjarðsveinasjúkdómi hér um árið og þar áður fylgdi hann ekki fötum vegna lekanda og flatlúsaágangs. Þegar hann var greindur með hjarsveinasjúkdóminn varð hann svo ruglaður, að hann sagði lækninum að hann hefði smitast af gömlu Framsóknarmaddömunni. Þá fóru nokkrir læknar í hlöðu Framsóknarfjóssins, en þar heldur Framsóknarmaddaman til í bæli sínu. Þegar til kom, var gamla konan svo baneitruð, að ekkert kom út úr sýnatökunni. Auk þess reiddist Framsóknarmaddaman læknunum og lagði til þeirra með orfi, sem hún hefir tiltækt við bælið, og náttúrlega lögðu læknarnir á flótta, því þeir eru blauðir menn og lítið gefnir fyrir annað en péééníííga.

Íslandi nú spáð þriðja sæti