Undur og býsn á Vatnsleysuströnd og einnig á Austurlandi

Þó að myndasmiðurinn segi að loftsteinninn atarna hafi ekki verið nema hnefastór, þá hefir hann samt verið nógu stór til þess, að sá sem hefði fengið hann ofan í höfuðið hefði trúlega slasast nokkuð alvarlega. Eitt sinn munaði minnstu að Kolbeinn Kolbeinsson skrifstofustjóri og framsóknarmaður fengi svona eldibrand beint á beran botninn úti á víðavangi. Tildrög málsins voru á þá leið, að Kolbeinn hafði farið með frillu sína þegar dimmt var orðið á afvikinn stað úti í sveit, sem sé á skurðbakka. Og sem Kolbeinn og frillan eru að athafna sig þar á skurðbakkanum vita þau ekki fyrri til að dynkur mikill með fjörugu neistaflugi verður rétt við hliðina á þeim. Þarna týndi frillan nærbuxunum sínum í óðagotinu við að flýja af vettvangi. Síðan hefir frillan verið hjartveik og átt afar bágt með svefn.

Í annan stað gerðist það austur á fjörðum, að haldinn var dansleikur með harmónikku og gleðilátum. Þá var það sem Fjallgarður bóndi í Ási varð óður af drukk og sparkaði nikkuleikaranum um koll. Rétt á eftir flaug Fjallgarður bóndi eins og vígahnöttur út úr samkomuhúsinu og var þar með lokið skemmtun hans í það sinn. Síðar flutti Fjallgarður til Reykjavíkur og gerðist það meindýraeyðir þar til hann var færður í fangelsi fyrir að hafa ætlað að vinna á óvini sínum, kaupmanninum á horninu, með rottueitri, en Fjallgarður hafði þann mann grunaðan um að ætla að fífla konu sína til samræðis.

Á Vatnsleysuströndinni hafa áður gjörst firn mikil og óvægin. Um miðja nítjándu öld grandaði elding mönnum á bæ einum þar um slóðir og var að vonum mikill óhugur í fólki þar um slóðir á eftir. Síðar uppfóstraðist á Vatnsleysuströnd Guðmundur Brynjólfsson og komst til manns, því hann er bæði rithöfundur og djákni. Og síðastliðið laugardagskveld tókst myndasmiðnum Friðþjófi Johnson að ná mynd af gríðarlegum vígahnetti, sem þaut á harðaspretti úr hyminhvolfunum og til jarðar. Ekki hafa enn borist fregnir af mannfalli á Vatnsleysuströnd af völdum þessa andstyggilega vágests.   

Vígahnöttur vestur af Vatnsleysuströnd