Þau voru öll lokuð inni vegna kórónuvíruss og nokkurra fleiri mjög alvarlegra kvilla

Þá hafa frú Ingveldur og Kolbeinn Kolbeinsson skrifstofustjóri, framsóknarmaður og vinur okkar allra, verið sett í sóttkví, ásamt hirð sinni. Þegar frú Ingveldi var birtur dómurinn um einangrunarvistina brást hún heldur illa við og tók í örlina á vinkvendi sínu, Máríu Borgargagni, og mismunaði henni inn í miðstöðvarkompuna og læsti. Fyrir í miðstöðvar kompunni vóru húsbóndinn, herra Kolbeinn Kolbeinsson sjálfur, og Indriði Handreður, báðir mög léttklæddir. Og eins og við manninn mælt þá köstuðu þeir sér báðir á Borgargagnið eins og blóðþyrstir kettir á þúfutittling.

Að sjálfsögðu var skipaður vörður við heimili frú Ingveldar og Kolbeins, það er að segja fjórir rassstórir og fílelfdir lögregluprjónar úr varðsveit Hálfdáns Varðstjóra, tveir hjúkrunarfræðingar og einn læknir, sérfróður um pénínga og einkavæðingar. Það hefir nú þegar komið fram hjá yfirvöldum að sóttkví frú Ingveldar og hennar fólks ekki ekki aðeins sprottin út af kórónuveirunni heldur einnig vegna rökstudds gruns um illvíga brókarsótt, miltisbrand og flatlúsafaraldur. En þær flatlýs, sem um er að ræða, eru af öðrum og miklu sterkari stofni en þessi venjulegi bölvaður fladdari sem hægt er að meðhöndla með steinolíu eða hárlakki; þetta eru stærðar pöddur með íllt augnaráð og rauðan, digran sograna.

Eins og staðan er núna á þessu augnabliki er ekkert útlit fyrir helgarsamkomu um næstu helgi að heimili frú Ingveldar og Kolbeins, en í kveld verður úðað sótthreinsandi efnum af sterkara taginu og skordýraeitri á og yfir hús þeirra hjóna og þess gætt kyrfilega að aungin sála fari út úr því húsi eða inn í það næstu vikur og jafnvel mánuði. Allar vistir verða keyrðar að húsinu og þær skildar eftir á stéttinni, en frú Ingveldur verður síðan að sækja góssið eftir að sendisveinarnir eru farnir. Það lítur því út fyrir að frú Ingveldur verði að segja ríkisstjórninni til símleiðis fyrst um sinn því að öðrum kosti mundi stjórnarendemið deyja ráðalaust innan nokkurra daga.

Óskað eftir heilbrigðisstarfsfólki á útkallslista