Jón Þór snöri hann niður eins og hund

Röskur maður Jón Þór, enda marghertur upp úr malbikunartjöru og búinn að anda að sér svo mikilli eimyrju af heitu malbiki að varð að endanum að pírata, sem læknar telja fremur illvígan sjúkdóm. En hvað um það, Jón Þór gerði sér hægt um vik í morgun og snöri gripinn Stenngrimm Johoð niður eins og hund frammi fyrir þingheimi og var fljótur að. Og með buxurnar á hælunum sá Stenngrimmur Johoð sitt óvænna og sleit þingfundi í snarhasti og skreið á fjórum fótum úr þingsal.

En þó svo Jón Þór hafi stökkt Stenngrimmi Johoð á verðskuldaðan flótta þá sitja ráðherragægsnin sem fastast á prikum sínum og sýna ekkert fararsnið á sér. Jón Þór verður að fara að skilja, að litlu skiptir þótt hann snúi einn vaninhyrndan vanmetasauð niður, að til lítils er unnið ef hann lætur undir höfuð liggja að reka úr túninu. Því miður virðist Jón Þór vera ennþá svo slæmur í höfðinu eftir tjörueiminn of skarkalann á götum hundrað og eins, að honum skortir skilning á því nauðsynjaverki, sem það væri, að tæma Alþingishúsið af þeim leiðinda- og sjálfsdýrkunarskepnum, sem þar hafa plantað sér niður.

Af Stenngrimmi Johoð er það aftur að segja, að eftir meðferð vankaða píratans á honum, skreið hann sem fyrr segir á brott og þiggur nú ókeypis læknisþjónustu að Óla góða, sem lærði á sínum tíma að líkna gömlum stjórnmálahróum á tímum farsótta, en einnig mun sú væna Swandeesý Sendiherrans hjúkkast dulítið með hinn veiklaða þingforseta, en hún hefir nú öðlast full læknisréttindi og doktórsnafnbót að auki fyrir að hafa horft á kóvíðveiruna part úr degi. Á meðan þessum hégóma fer fram, megum vér enn bíða eftir réttlætinu sem felst í að þinghúsið verði tæmt af þessum framúrskarandi heimsku lufsum, jólatrjám og óvinum alþýðunnar, sem þar búverka. 

Þingfundi slitið eftir fimm mínútur

Athugasemdir

[Guðmundur Ásgeirsson, 16.4.2020 kl. 13:36]

Jón Þór býr reyndar í póstnúmeri 108.

[Jóhannes Ragnarsson, 16.4.2020 kl. 13:48]

Ja hver andskotinn. Það er þá ekki eitt heldur allt. Það er þokkaleg frammistaða, eða hitt þá heldur, hjá þessum kurfi að búa í 108 þegar honum ber siðferðileg skylda að búa í 101.

[Guðmundur Ásgeirsson, 16.4.2020 kl. 14:39]

Er ekki nóg að vinnustaðurinn sé í 101?

[Jóhannes Ragnarsson, 16.4.2020 kl. 15:05]

Jú, það verður að duga í þessu tilfelli, þótt ekki sé það alveg vel gott.