Eftirmenn og arftakar hinna þríheilögu í sjónvarpssal

Í dag var hin þríeina helgimannaþrenning sett af sem daglegir gestir í sjónvarpssal og á skjáum landsmanna. Héðan í frá verður þetta guðlega sett í glerskáp og aðeins notað til spari. Eflaust verður vinsælt hjá ríku fólki, sem hefir notið hlutabótaleiðarinnar ríkulega, að taka þrenninguna á leigu og hafa til sýnis í veislusölum sínum á hátíðarstundum. Það er auðvelt að sjá fyrir sér flutningamenn bera hinn þríeina guðdóm í búrum inn í híbýli sægreifa, Engeyinga og Samherja þegar fagna skal glimrandi viðskiptasamningi, sjötugsafmælis greifa, eða dýrðlegum arðgreiðslum.

En fyrst svona er komið helgispjalli þrenningarinnar, er auðsætt að finna verður viðeigandi fólk til að hafa daglegar hugvekjur fyrir landsmenn og freista þess að gera þá að alminnilegum mannéskjum með frábærum heilaþvotti og persónudýrkun. Upp í hugann koma farsælir Sjálfstæðismenn, sem vel gætu séð um þessa húslestra, en við skulum samt varast að nefna einhver nöfn á þessu stigi málsins. Við vitum öll hvaða Sjálfstæðisfólk er heppilegast til starfans.

Þess verður og að geta á þeim tímamótum, sem upp runnu í dag, að þegar liggur fyrir beiðni valinkunns sómamanns, kapítalista, guðfræðings og prófasts, þar sem hann fer þess á leit, að honum verði falið húslestrahald í beinni útsendingu úr sjónvarpssal fyrst hin drotni þóknanlega þríeining hefir verið komið fyrir uppi á hillu. Þessi fórnfúsi maður er að sjálfsögðu eldklekurinn síra Baldvin, prestur og prófastur til Gemlufallaþinga. Fullvíst er, að síra Baldvin á erindi við landsmenn, einkum villráfandi sosialista og öfugugga, sem prófasti er nokkuð í nöp við og vildi glaður geta snúið frá villu síns vegar. Í marsmánuði, síðastliðnum, veiktist kérlíng í prófastdæmi síra Baldvins upp úr kóvíðvírusi og var ekki hugað líf. Þessa kérlíngu reif síra Baldvin upp úr rúmi sínu með eigin hendi og hýddi, og linnti ekki flengingunni fyrr en allur kóvíð nítján var á bak og burt úr henni. Síðan hefir kérlíng ekki kennt sér meins. 

Á eftir að sakna fundanna