Endurreisn Sovétríkjanna með aðild Íslands í sjónmáli

Félagi Pútín hrökkur nú ekki í kút þótt örfáir einkennilegir menn mótmæli honum í grennd við rússneska sendiráðið á Íslandi. Ónei, herra Pútín heldur áfram lýðræðisvæðingu í heimalandi sínu, leggur nýja stjórnarskrá í dóm fólksins og fær hvarvetna huggulegar móttökur heimafyrir. Nærliggjandi ríki vilja gjarnan sameinast Rússlandi og margir vilja endurreisa Sovétríkin, sem drykkjusjúkir og hlandvitlausir aumingjar í valdaaðstöðu eyðilögðu fyrir þrjátíu árum. Skemmst er að minnast þegar Krímverjar sameinuðust Rússlandi eftir þjóðaratkvæðagreiðslu fyrir fáum árum, en það kalla Morgunblöð heimsins að Rússland og Pútín hafi innlimað Krím.

Varðandi forsetaembættið í Rússlandi og Pútín, þá er ekki nema sjálfssagt að Rússar fái hafa sinn Pútín eins lengi og þeir vilja, þess vegna í fimmhundruð ár ef þannig verkast. En vestur í Bandaríkjunum, USA, er þjóð sem er að veslast upp í kóvíði nítján og hefir í ofanálag galinn forseta, sem fékk tveimur eða þremur milljonum færri atkvæði en keppinauturinn. Þessháttar fásinnu kalla Morgunblöðin frelsi og lýðræði.

Í næstu viku fer frú Ingveldur í mikilvæga heimsókn til Rússlands og mun funda með Pútín í Kreml. Munu þau leggja á ráðin um hvurnig skuli staðið að stofnun SovétÍslands eftir að Sovétríkin hafa verið endurreist, heimsbyggðinni til stórra heilla. Þrátt fyrir að frú Ingveldur hafi alla sína hundstíð verið stæk Sjálfstæðisflokkskona, þá hafa ætíð blundað með henni hreinir og tærir stórveldisdraumar. Hún gerir sé fulla grein fyrir að Ísland verður aldrei stórveldi í ESB, ruslahaugi gömlu nýlenduböðlana; ekki verður Ísland mikið stórveldi með því að stunda opinberan skækjulifnað með USA, það er fullreynt nú þegar. Og þá er raunhæfasti möguleikinn á stórveldisdraumurinn rætist með því að Ísland verði sovétlýðveldi í endurreistum Sovétríkjum.

Mótmæltu Pútín við rússneska sendiráðið

Athugasemdir

[Guðmundur Ásgeirsson, 1.7.2020 kl. 21:31]

"lýðræðisvæðingu" ... bwahahahahahaha!

[Jóhannes Ragnarsson, 1.7.2020 kl. 22:06]

Já vinur minn, lýðræðisvæðingu. Og það er nú svo.

[Guðmundur Ásgeirsson, 1.7.2020 kl. 22:13]

Er það út af þessu sem Kata Jak er núna að leggja til að lengja kjörtímabil forseta Íslands í sex ár?

Liður í aðild Íslands að endurreistum Sovétríkjum?

[Jóhannes Ragnarsson, 1.7.2020 kl. 22:24]

Ég geri fastlega ráð fyrir því, já. Katrín er ekki svo vitlaus að henni sé fyrirmunað að búa í haginn fyrir það sem koma skal.

[Borgþór Jónsson, 4.7.2020 kl. 00:22]

Það er nú frekar andstyggilegt að leggja nafn Putins við Katrinu Jak.
Putin var samt búinn að bjóða forsetanefnunni okkar hernaðaraðstoð ,en hann hafði ekki rænu á að þyggja boðið.
Forráðamenn landsins eru algerlega heillum horfnir.