Aldurhnigin hryggðarmynd dansar á grafarbakkanum með Bónuspoka í höndinni

Sumir eru svo illa gerðir að þeir mega aldrei sjá neitt hallærislegt eða útjaskað og niðurnítt öðru vísi en að hæla því í hástert. Hvað það er sem veldur slíkum undarlegheitum og mér liggur við að segja óþverraskap má Fjandinn einn vita. Því ósmekklegri menn og málefni eru því betra, segja hin illþenkjandi fól.

Nú er birt mynd að afgamalli og hrumri kérlíngarskrukku undir merkjum Gussa tískupúngs og greinarhöfundur stökkur upp af stólnum og klappar saman lófum svo jaðrar við beinbrot og lýsir því yfir að hin aldurhnigna hryggðarmynd sé glæsileg! Glæsileg! Drotinn á hymmnum komi í veg fyrir slíkan hugsunarhátt sem er spilltari en allt sem spillt er. Kérlíngarálftin, sem um ræðir og sögð er so glæsilega, minnir óneitanlega á vofu á grafarbakka, íklædd druslum úr lérefti, sennilega notuðum hveitisekkjum, og með hraksmánarlega gula töskutuðru í annarri höndinni, Bónuspoka, ef ég þekki það ílát rétt, sem ég geri.

Það er ekki fallegt að gera grín að örvasa gamalmenni sem er að dansa síðasta tangóinn á grafarbakkanum. Einusinni tóku tveir drukknir ruddar sig til og gripu tæplega tíræðan mann, sem var á stjákli fyrir utan elliheimilið, fóru með hann út í kirkjugarð og slökuðu honum án minnstu miskunnar ofan í opna gröf sem þar var og skildu hann þar eftir. Skömmu síðar mætti líkfylgd með kistu í eftirdragi að gröfinni og stóðu vonir manna til að jarðsetja nefnda kistu og kistubúann sérstaklega í hinu kalda og myrka grafarverki. En þegar til kom heyrði fylgdarlið hin látna hryglur og þrusk koma upp úr gröfinni og greip þegar um sig ofsahræðsla meðal lifenda, sem tóku til fótanna og skildu kistu sína eftir eina og yfirgefna á grafarbarminum. Loks þegar ábyrgir menn áttu leið í kirkjugarðinn og kíktu ofan í gröfina sáu þeir hinn næstum tíræða öldung sitja flötum beinum á grafarbotninum önnum kafinn við að kveða Pontusarrímur hinar eldri að hætti Jóns Hreggviðssonar. Var hinum ábyrgu mönnum þá öllum lokið og mokuðu moldarhrúgunni á grafarbarminum ofan í gröfina. Síðan hefir ekkert til hins næstum tíræða spurst.   

Jane Fonda glæsileg í nýrri herferð Gucci