Undirrót allrar óhamingju

Ef það er rétt hjá karlaumingjanum að ferðaþjónustunni verði lokað fram að jólum, þá eru það miklar gleðifréttir. Sem kunnugt er þá munu ferðalög vera einhver mesti viðbjóður sem þekktur er á byggðu bóli. Gamla konan í Brekkukoti, amma Álfgríms, vissi sem var að ferðalög eru undirrót allrar óhamingju og gjörðu Garðar Hólm að þeim leiksoppi í lífsins ölduróti sem hann varð hvað frægastur fyrir. Þrátt fyrir það, þá var Garðar Hólm mörgum sinnum betri söngvari en Jóhannes Þór Skúlason málaliði aumasta auðvalds landsins. Og satt að segja, það hefir komið alvarlega til tals hjá okkur sem heitum Jóhannes, að fá lögbann á að þessi kurfur fái að kalla sig Jóhannes og knýja hann þannig til að skipta um nafn.

Við Jóhannesanir eru sammála um, að þessi Skúlason ætti að heita Indriði, eins og Indriði Handreður, því hann er viðloðandi Framsóknarfjósið, að minnstakosti skúrræxnið sem gamla Maddaman lét hrófla upp við Fjósið til geyma Miðflokkinn og jafnvel fleiri Totúlísta í. Einnig væri bráðnauðsynlegt að gjöra ferð fyrir þennan Skúlason senda hann eitthvert langt í burtu, til dæmis til Tortólu elligar Seychelleseyja, hvar innistæðurnar dafna og leynireikningarnir skjóta rótum. En nú er sem sé ferðaþjónusta aflögð fram að jólum og jafnvel mikið lengur, ef Guð lofar.

Fyrr á tíð, þegar svartidauði, stórabóla og spánnskaveikin riðu húsum á Íslandi minnist aunginn maður á ferðalög, því síður ferðaþjónustu. Að vísu höfum vér átt einn ferðaþjónustubónda, en aðeins bara þennan eina, og það var hann Björn hérna Haraldsson að Öxl í Breiðvíkurhreppi á Snæfellsnesi. Það var sko maður. Frumkvöðull, áræðinn og ráðsnjall. En svo kom helvísk öfundin til og öfundsjúkir illræðismenn, sem öfunduðu Björn af brautryðjandastarfi hans og ferðagróða, drógu hann úr húsi í Öxl, leiddu hann út að Laugarbrekku og hjuggu hann þar í spað; grófu síðan tættlurnar af þessu óskabarni íslenskrar atvinnusögu út um víðan völl svo tryggt væri að hann gréri ekki saman aftur eins og hrökkáll. Síðan lá ferðaþjónusta blessunarlega niðri þar til eftir Eyjafjallajökulsgos. Nú er þessi vá vonandi aftur af oss aftur tekin og á henni slökkt bæði til lengri og skemmri tíma.

Ferðaþjónustunni lokað fram að jólum

Athugasemdir

[Þorsteinn Siglaugsson, 31.8.2020 kl. 23:24]

Kanski Sóttólfur leggi næst til að ferðamenn þeir sem skimaðir eru og dæmast með kínakvef verði jetnir í Fríhöfninni. Það veitir víst ekki af kjetinu eins og ástandið er einatt suður með sjó núorðið. "Á útlenskum þrífast börnin bezt" verður þá viðkvæðið suður þar.