Þær áttu líka sinn dýrðartíma með þeim frægu

Eru smá-telpurnar Nádíjá Líndal og Laura Clausen andlega náskyldar frú Ingveldi og Máríu Borgargagni? Svarið er: Já. Þær eru svo skyldar að þær gætu allar verið tvíburasystur. Auk þess eru þær menningarlegar svo af ber. Það má segja að Líndal og Clausen hafi stungið frú Ingveldi og Borgargagninu ref fyrir rass þegar sveimuðu eins og hljóðlausar flugur inn á Hotél Sugu og beint upp í til drengjanna Masons og Fódens. Það er alltaf virðingarvert þegar ungar jómfrúr fara beint upp í til einhvers.

Frú Ingveldur og Máría Borgargagn áttu líka sína dýrðartíma með þeim frægu. Til dæmis tóku þær laglegan feil þegar þær vóðu einbeittar upp á Hotél Vík við Hallærisplan á áttunda áratugnum. Þeim hafði borist fregnir af því að hin heimsfræga saungsveit, Ledd Zéppelín, væri komin öðru sinni til landsins til að halda tónleik í Gamla bíói og mundu hinir frægu meðlimir kvartettsins halda til á Hótéli Vík þá daga er þeir dveldust á Íslandi. Því miður var þarna eitthvað málum blandið því það voru ekki Ledd Zéppelín sem bjuggu að Hotéli Vík heldur færeyíska hljómsveitin Trangissensspælararnir, sem borist höfðu til Íslands til að leika fyrir dansi í Íngólfscafé.

Það skipti aungvum togum, að það upphófst helvískur darraðardans á Hotéli Vík við komu þeirra stallsystra og má segja að þær hafi á undraskömmum tíma yfirspilað færeyísku drengina, sem allir vóru komnir yfir fertugt og fimmtugt, og gjörspillt þeim með óguðlegum uppátækjum sínum og siðferðisskorti. Nokkrum dögum síðar komust þær frú Ingveldur og Borgargagnið að því að þær höfðu ekki lagst með saungsveitinni Ledd Zéppelín heldur einhverjum biluðum harmónikkuklikkuðum færeyíngum á hvolfi. Og þær böðuðu sig og sturtuðu fimm sinum á dag í heila viku og brúkuðu mikla sápu eftir að þær komust að hinu sanna. Þessi sorglegi atburður í lífi frú Ingveldar og Borgargagnsins gjörðust fyrir daga áfallastreituröskunar og því fór sem fór fyrir þeim: Frú Ingveldur giftist og hóf búskap með erkiafstyrminu Kolbeini Kolbeinssyni framsóknarmanni og skrifstofustjóra, en Máría borgargagn gjörðist um síðir frilla Indriða Handreðs og enn síðar eiginkvendi hans. Af skemmtikröftunum Trangisspælurunum frá Færeyjum bárust þær sögur, að þá er þeir snöru aftur til sinna heimaslóða beið þeirra skilnaður og brottrekstur af heimili, því konur þeirra höfðu frétt af glæpum manna sinna á Íslandi áður en þeir komu aftur til Færeyja. Eftir þetta vesluðust þeir upp í strætinu og síðast reknir til Grænlands þar sem þeir hurfu fyrir fullt og allt. 

Nadía og Lára: Eyddu 25 þúsund í þessa drengi