Ekki skulum vér leiða Djöfulinn í freistni

Hvaða erindi ætli þessir þokkapiltar hafi átt þarna að Geldingadölum? Því er fljótsvarað: Nákvæmlega ekki neitt. Samt voru þeir þarna á vafsi á hjólhestum, vitandi að jörðin gæti gleypt þá með eldi og eiturgufum. Það er aunginn vafi á að þarna var Fjandinn að verki og ætlaði sér að veiða drengina niður til sín í Helvíti. Þá hefðu þeir betur farið að dæmi Kolbeins Kolbeinssonar, en hann sefur undir rúmi sínu í dag, og látið fyrirberast heima hjá sér. 

Svo hefir enn eitt vandamálið verið að ryðja sér til rúms, en það er vaxandi árátta fólks til að hjóla í svefni. Alvarlegt tilfelli af þessu tagi varð í vetur þegar steinsofandi kvendi kom á fjallahjólhesti út á Látrabjarg og reið eins og ekkert væri fram af og hvarf niður í urðina, um það bil fjegurhundruð metrum neðar. Það var víst ekki félegt hjólið þegar að var komin, svo beyglað og brotið sem það var eftir flugið. Nú er ekki þar með sagt að hjólaknaparnir í Geldingadölum hafi verið sofandi á reiðskjótum sínum þarna í dag þegar Djöfullinn sjálfur hugðist fanga þá ofan í fordyri Helvítis. Því enn sem fyrr hefir Andskotinn illskuflár sína snöru snúna þeim snögglega tilbúna, sem fara með fals og dár.

Í dag einkennist heilsufar Máríu Borgargagns af tíðum þvaglátum, stunum og dæsingum, sem líkjast hvalablástrum. Þessi vanheilsa stafar af ógætilegri öldrykkju meðfram parkódínforteáti. Fyrir utan hin andstyggilegu þvaglát á fimm til tíu mínútna fresti, lýsa sjúkdómseinkenni Borgargagnsins sér eins og hún hafi gleypt múrsteina, því allt er klossfast eins og af grjóthertri steinsteypu í ristlinum, og þá er sem dökkgrátt kólguský vomi yfir heilabúinu og kalli fram ófétislega atburði úr fortíðinni. Í þessu ástandi kjökrar Máría Borgargagn mjök yfir lauslæti sínu og afmorshneigð, sem sannast sagna hefir verið dálítið úr hófi fram hjá henni á stundum, ekki síst fyrr á árum. Það var einmitt í svona sjúkdómskasti, sem Máría orkti ljóðið ,,Láfudansinn", sem var frumflutt á þjóðhátíðardaginn 17. júni.  

Voru 200-300 metra frá sprungunni