Hún er dauð, gjaldþrota og fer innan skamms á uppboð

Loksins er þetta að verða búið. Brátt verður Reykjavík lýst gjaldþrota og fer á uppboð. Þetta hefir svo sem verið yfirvofandi lengi, sjúklingnum hefir hrakað jafnt og þétt og nú er hann kominn á líknardeild til að þiggja andlátsaðstoð. Já, drengir mínir, það vinnur aunginn sitt dauðastríð, allra síst Reykjavík. Mest verður þó gaman að sjá hvað þeir skrifa í dánarvottorðið. Flestir eru á því að þar muni standa: ,,Myrtur af sínum eigin kláðagemlingur." Og svo fá óráðsíuslyttin sem unnu á höfuðborginni að ganga lausir eins og hvurt annað hefðarfólk.

Dagur nokkur Béé, sem kvað hafa læknispróf, og farið hefir fyrir tilraunapyntingum á Reykjavíkurborg, er nú farinn að reyna að fegra sinn hlut og kjánanna sem hafa styrkt hann, með því að bera á borð að Reykjavík hafi fengið kóvíð nítjánda og sé nú sem óðast að drepast úr þeim sjúkdómi í öndunarvél. En það kemur fyrir lítið hjá Deginum að fría sig ábyrgð á andláti Reykjavíkur, það vita hvort eð er allir hvurjir lögðu til hennar með píníngartólum uns ekki varð aftur snúið.

Nú kemur það í hlut Samherjanna, Mogga, Sjálfstæðisflokksins, Kaupfélagsstjórans á Sauðárkróki, Kópavogs, Seltjarnarness, Garðahrepps og Mosfellssveitar að kaupa afskræmt og sundurlimað líkið af Reykjavík á uppboði. Þannig fór að lokum fyrir arfleyfð Ingólfs Arnarsonar, sem var þó aldrei til. Í dag tjóar ekki fyrir kláðagemlingana í ráðhúsinu í Reykjavík að mjókka götur, afnema bílastæði, bruðla á Óðinstogi og í bragganum í Nauthólsvík. Það mun heldur ekki duga fyrir gemlingana að ulla framan í Íhalds-Mörtu, þótt slæm sé, eða brúka stólpakjaft við Vigdísi. Reykjavík er dauð og fingraliprir samherjar eru þegar byrjaðir að róta í rústunum. 

Staðan 15 milljörðum verri en áætlað var

Athugasemdir

[Grímur Kjartansson, 29.4.2021 kl. 16:34]

En áhrif hraðlækkana og Borgarlínunnar munu auka enn hróður Stafrænnar Reykjavikur sem á ekkert skylt við þá þjónustu sem almenningur telur að Borgin eigi að veita sbr
Þjónustuhönnun RVK (reykjavik.is)

líkt og nýlegt dæmi um umsóknir um sumarnámskeið barna sýndi fram á þá er þessi þjónustuhönnun ekki fyrir borgarana

[Sigurður I B Guðmundsson, 30.4.2021 kl. 10:48]

Svo verður líkið keyrt á 30km. ferð um borgina í strætó!