Jóhannes Ragnarsson

3.12.2021 | 17:44

Hræðileg örlög vofa yfir honum

Æ hvaða ólán, sveik hann undan skatti? Og þetta er innvígður og balsameraður Valhallardrengur í fallega sniðnum jakkafötum. Hverskonar uppeldi er þetta á drengskrattanum? Svo verður honum fleygt inn á gang til voðalegra glæpamanna á Hrauninu og þeir munu rífa hann í sig, rífa hann beint upp í ból til sín, rífa hann í tætlur. Það er varla öfundsvert hlutskipti. Eða hvað? Þó sveik hann bara aðeins undan skatti.

Á Hrauninu er hroðalegur glæpamaður, algjörður öfuguggi og viðurstyggð. Sá náungi er kallaður Fóli og er eins og nafnið bendir til, eitt harkalegt og djöfullegt svín. Hann er hafður á perraganginum. Þessi hryllilega mansmynd er sögð skilgetið afkvæmi Sathans. Menn hafa rætt sín í millum, og þá konur ekki síður en karlar, að fara með þetta ruddamenni í lífslokameðferð; hreinlega fá kvikindið dæmt í slíka meðferð elligar demba helvítinu í þessháttar meðhöndlun án dóms og laga. Í klefa þessum óvætti á litli skattsvikarinn okkar á hættu að lenda.

Svo getum vér spurt oss hvort líkurnar eru meiri að minni á að Valhöllungurinn muni betrast við að deila fangaklefa með hinu illvíga og óeðlisfulla gerpi, sem sagt er að sé son Sathans. Nú er mála sannast, að Sathan er ekki neitt lamb við að leika, því hann er sagður eiga allskostar við hvurn sem er, líka Sjálfstæðisflokkinn. Sem stendur beinast vonir vorar að nýjum dómsmálaráðherra, að hann ógildi héraðsdóminn yfir Valhallarbarninu og forði því frá að gista að syni Djöfulsins austur á Litla Hrauni í marga mánuði.