Til hamingju Siggý Bauntens með árin (306)

Þá er nú hún Sigga okkar Bauntens orðin mjög gömul. Í raun og sann er kerlíngarkjökrið orðið óguðlega aldurhnigið og ,,fallinn af fótum fram" eins og oddvitabjáninn sagði þegar hann var spurður um hvernig hún amma hans hefði það. Nú, Sigga er sem sé orðin þrjúhundruð og átta ára (308 ára) og er syngur ennþá. Það er að segja, hún reynir að framleiða hljóð með raddböndum sínum sem hljóma eins og þegar ryðbrunninn gaddavírsstrendur er strokinn eða nuddaður með hrjúfri spýtu. Fyrir nokkrum vikum var Siggí Bauntens fengin til að ,,syngja" útför látinnar heiðurskonu með þeim afleiðingum að hin andaða sparn kistulokinu ofan af sér og reis upp frá dauðum og strunsaði á dyr í fússi.

Eins og vænta má, hefir Siggó Bauntens lifað tímana tvenna, þrenna og ferna. Hún var við guðsþjónustu síra Jóns Steingrímssonar er hann kvað gosið í lakagígum niður og sigldi með sama skipi og Jón Hreggviðsson til Kaupinhafnar þegar hann hugðist taka mál sín upp aftur. Sjálf segir Sigga Bauntens hafa verið viðstödd Tyrkjaránið, en það er eitthvað ofsögum sagt hjá henni, sennilega misminni. En hún þekkti Kambránsmenn og lyfti oft glasi með þeim á góðri stund, þókt ekki hafi hún verið með þeim í för er þeir heimilisfólkið á Kambi þeirra erinda að ræna fé bóndans.

A síðari árum hefir Sigga stundað söng með góðum árangri. Til dæmis söng hún dúett með Garðari Hólm á frægum tómleikum í Bárunni og nokkru síðar söng hún jazz með Jöreni Gráferngord, sem vakti reiði og hneykslan menntaðra Íslendinga. En lengst verður sönglistar Siggó minnst fyrir túlkun hennar á Töfraflautu Mósarts, en þar fór hún með hlutverk sjálfrar Töfraflautunnar. Á allra síðustu tímum fór hún svo að söngflytja paunkkveðskap, það fór alveg með þetta litla sem eftir var af röddinni svo að nú hefir það hættulegar afleiðingar ef henni verður það á að upphefja raust sína, svo sem eins og dæmið með dauðu konuna sannar, sem reis upp undan greftrunarhljóðum Siggýjar Bauntens. Og svo var nú það og vér óskum Siggu Bauntens til hamingju með árin þrjúhundruð og sex og væntum þess að hún hætti að leggja í vana sinn að vekja upp sannarlega kóvíðsdauðar manneskjur með hljóðum sem eiga engin sín lík á byggðu bóli.

Þrefalt stórafmæli hjá Siggu Beinteins í ár