Jóhannes Ragnarsson

5.3.2022 | 20:54

Gluggaskraut samherjanna birtist eins og útfrymi með pípuhatt skinhelginnar

Þá hafa einhverjir aðframkomnir auðnuleysingjar í Fjarðarbyggð útbúið vel borgaralegan kvennalista til brúks þar austurfrá í bæjarstjórnarkosningunum í vor. Svo er að sjá, samkvæmt þar að lútandi fréttatilkynningu, að Katrín Jakobsdóttir hafi blessað yfir kvennalistann atarna, sem bendir aftur til þess að henni hafi um stundarsakir tekist að losa sig úr örmum Stoltenbergs og NATÓ, en það verður varla lengi, því Katrín er mjög elsk að stríðsfélaginu NATÓ og Stoltenbergi framkvæmdastjóra.

Því er ekki að leyna, að Fjarðarbyggð er fjarska mikið undir áhrifum samherjanna, undir járnhæl þeirra segja margir, en það kemur heim og saman við burgeisaást Katrínar og gluggaskrautseðli. Kvennalisti Hreyfingarinnar framboðs(HF) fyrir austan sýnir í reynd úrkynjun og andleysi Austfirðinga, sem forðum voru miklir kommúnistar og stjórnuðu Neskaupstað árum saman af myndarbrag. Þeir þóktu ötulir kommúnistar þeir Lúðvík, Bjarni og Jóhannes, en því miður vanræktu þeir uppeldishlutverk sín svo glæsilega, að þriðja kynslóð frá þeim var ekki aðeins ókommúnísk með öllu, heldur kapítalísk og gjörðust snemma fótaþurrkur samherjanna og sviku eigu alþýðunnar á Norðfirði í eigu þeirra sem eru sannarlega samherjar í græðgi og auðvaldi. Enda eru þessi lubbar nú þegar gleymdir og aunginn veit nöfn þeirra né heimilisföng.

Hinn undanrennufúni Kvennalisti HF í Fjarðarbyggð er eflaust góður og viðeigandi minnisvarði um sviknar hugsjónir, sameign alþýðunnar á atvinnutækjum og hraðfara hrörnun vinstrimennsku á Austfjörðum. Og vel er við hæfi að gluggaskraut samherjanna, frá Stenngrimi Johoð og Thorstene Mó til Álfheiðar Inga og Engeyinga, sjálf tvíbytnan á andafundum NATÓ, skuli hafa séð sér fært að birtast allt í einu austur á landi eins og útfrymi með pípuhatt skinhelginnar til að vígja og blessa náttúrulausan Kvennalista HF í Fjarðarbyggð.