Hann var urðaður utangarðs í móum

Þá hefir Reykjavíkuríhaldið komið sér upp kvenmanni, og annarri til vara, til að greiða krataeðlisíhaldinu Degi Bé það rothögg sem mun duga. Í gær fór líka fram, í kyrrþey, poletisk útför Eyþórs Arnalds; hann var urðaður utangarðs í Hádegismóum, að húsabaki; ,,kalt er við kórbak, hvílir þar Eyþórs brak, allir strengir sellósins slitnir og ljósastaurinn brotinn. En blessuð dúfan hún Hildur Íhalds slapp lífs frá hildarleiknum, grett og snúin svo sem vera ber.

En Hildur er fyrst og fremst ráðin af Sjálfstæðisflokknum til að ganga milli bols á höfuðs afglapanum Degi Bé og ganga í leiðinni frá hnýflóttum smá-drýsilpúkum eins og Holu Hjalla og Heiðu, sem ekki þurfa þung högg til að fjúka út í hafsauga. En svo höfum við líka orðið vör við krataeðlistalsmáta úr skúmaskotum skinheilagra í Samfylkingunni, þess efnis að Hildur Íhaldsins sé ósköp frjálslynd, en tækifærismennska, undirferli og bakstungur heita að sjálfsögðu frjálslyndi á tungumáli krataeðlisins. Þetta frjálslyndishjal undurgóða og heiðarlega fólksins í Samfylkingunni þýðir auðvitað líka, að Samfylkingunum, samkvæmt krataeðli þeirra, finnst tímabært að bjóða Sjálfstæðisflokknum til meirihlutasamstarfs eftir kosningar, það er að segja ef þessir tveir auðvaldsflokkar fá meirihluta borgarfulltrúa í kosningunum í vor. 

Á heimili frú Ingveldar og Kolbeins ríkja þó efasemdir um Hildi Íhaldsins, því þau sæmdarhjónin eru þess fullviss að Hildur sé ekki sá baulurass sem hefir bein í nefinu og harðla ólíkleg til að standast óheilindum krataeðlisins snúning í kosningunum framundan. Upphaflega lagði frú Ingveldur til við forustu Sjálfstæðisflokksins, að í vor ætti Flokkurinn að tefla þeim Hönnu Birnu, frú S. Andersen og Vígdísihaux fram í þrjú efstu sætin. Með þeim hætti, taldi frú Ingveldur, að þrennt mundi vinnast: Fémínístarnir kæmu allir sem einn til Sjálfstæðisflokksins, íhöldin mundu gleðjast og aumingjahersveit Dags Bé legði á hamslausan flótta og hennar yrði ekki vart meir. 

„Gott að finna svona afgerandi stuðning“