Voðaverk framið í Valhöllu í dag og fórnarlömbunum sparkað út á götu án áfallahjálpar

Mikill harmur er kveðinn að húsi og kynþætti Jóns Gunnarssonar og hreysi hans orðið að táknmynd fyrir hryllilega uppgjöf og niðurlægingu. Og svo mikill var harmagrúturinn, Nonnyboy var leiddur, umflotinn tárum, á brott frá Valhöllu ásamt með húskarli sínum Brynjari. Á þessari stundu er enn ekki vitað hvort þessum vænu mönnum var veitt áfallahjálp eftir hið voveiflega illræðisverki, sem á þeim var framið í dag, eða hvort þeir fái nokkra áfallahjálp yfir höfuð. Sjónarvottar sögðu ennfremur að þorparinn Bjarniben hefði hjálpað bæði Nonnyboy og Brynjari út um aðaldyr Valhallar með fólskulegu fótsparki og þeir hrokkið undan því út á miðja götu, en vér seljum það ekki dýrara en við keyptum.

Vegna þessa atburðar ríkir nú upplausn á heimili frú Ingveldar og Kolbeins, en þau hafa síðustu vikur beitt sér gegn því að framið væri það skelfilega níðingsverk sem hefir nú komið á daginn. Þeim frú Ingveldi og Kolbeini er lítt um Kjörísdrottninguna gefið, en hún kvað vera orsökin fyrir endalokum Nonnyboy og Brynka, sem bæði eru snautleg og yfrið hlægileg. Frú Ingveldur var fyrir löngu búin að banna Bjarnaben að vinna Nonnyboy mein, en Bjarniben virti meira að segja það bann að vettugi og sat á svæsnum launráðum við sínum bestmanni og hratt honum loks fyrir hinn alræmda pólitíska ætternisstapa í dag. Fyrr mátti víst gagn gefa og Drotinn gaf og Drotin tók.

En nú mun fara að kortast lífið ríkisstjórnarinnar, sem betur fer mundi margur segja. Þegar fregnir bárust út af voðaverki Bjarnaben hringdi frú Ingveldur umsvifalaust í vinkvendi sitt, Máríu Borgargagn og tilkynnti henni höstugum rómi að hún væri bölvuð, andskotans graðpeysa og hlandsóttargemlingur; ennfremur að Indriði Handreður, eiginmaður Borgargagnsins, væri gagnslaus liðleskja og ónothæfur aumingi til allra verka. Máría Borgargagn svaraði að bragði, að það væri ekki þeim hjónum að kenna, að Bjarniben væri það svínabest sem hann greinilega væri og hefði nú berað með fordæmalausri og fordómalausri árás úr launsátri að fórnarlömbunum Nonnyboy og Brynjari. Loks sammæltust um, að nú væri þegar upp runninn lokakafli ríkisstjórnarinnar og muni þær hér eftir einhenda sér í að grafa undan henni og slá hana af með haustinu eins og kviðslitinn riðuveikhrút.   

Svona er pólitíkin

Athugasemdir

[Ingólfur Sigurðsson, 18.6.2023 kl. 18:07]

Heyrðu Jóhannes minn, var ekki Jón G. bara að gera það sem krafizt er af góðum sjálfstæðismanni og Brynjar? Verra finnst mér með Bjarna B. og Þórdísi, þetta lið er ekki sannfærandi fyrir flokkinn, og gæti alveg eins verið í Samfylkingunni.

En ömurlegast er ástandið á Vinstri grænum. Ég hef kosið þann flokk nokkrum sinnum, en það þyrfti að toga mig til þess með harmkvælum eftir þetta stjórnarsamstarf.

Eins og ég hef skrifað, það er allt orðið einn ógeðsgrautur útúr þessari ríkisstjórn og enginn veit hvað snýr upp og hvað niður og hvað er hvers.

Jón G. stendur eftir sem einn af fáum sjálfstæðismönnum sem rótgrónir fylgismenn eru ánægðir með. Hann gæti stofnað nýjan flokk og mætti sá gamli hverfa, eins og sumir aðrir flokkar og forystusauðir sem ekki eru trúir stefnu sinni.

[Jóhannes Ragnarsson, 18.6.2023 kl. 19:10]

Nonnyboy hefur þetta forláta Sjálfstæðisflokksinnræti og vindgang sannara Sjálfstæðisflokksmanna. En fyrir mestu er Kjörísdrottningin er byrjuð að brosa.