Bídur, Trumpið og íslenskir nýsosialistar

Það er heldur lakara, ef rétt reynist, að spilaborg Bídirs bandaríkjaforseta sé að hrynja ofan í hausinn á honum svona rétt fyrir kosningar. Bídur forseti er sem kunnugt kaldur karl, sem hrasar í tíma, en einkum þó ótíma, niður tröppur húsa og landganga flugvéla eins og trúðfífl eða ofurölvi drykkjurútur sem fengið hefir sér of mikið neðan í því. En Bídur á sér, þrátt fyrir allt, sína eindregnu aðdáendur, sem elska hann og dá sem einn dáindisgóðan vinstrimann og sosialist.

Til dæmis eru nýsosialistar á Íslandi ákaflega hrifnir af Bídi, telja hann mankynsfrelsara og Demókrataflokkinn hans aldeilis vel heppnaðan sosialkratískann framsóknarflokk, gott ef ekki kommúnískan. Svona eru nýsosialistar dagsins í dag vel að sér stéttabaráttufræðunum og sosialiskri díalekt. Allir sem einn. En svona okkar á milli sagt, þá hafa fémínístar og útvatnaðir nýsosialistar gengið af sósíalísku hreyfingunni á Íslands dauðri, en það er eitthvað sem Mogga, Sjálfstæðisflokknum og krötum tókst aldrei þrátt fyrir endalausar tilraunir til þess, þökk sé Silju Boru, Höllu Gunnars og Gunnarismára.

Á meðan höfuðhetjan Bídur veltist um tröppur og troðninga og Trumpur andskoti hans liggur skelfingu lostinn og eyrnaskotinn undir rúmi, ráfa aðdáendur þeirra á Íslandi um með spekingssvip á trýnunum og ræða nýjustu vendingar og horfur í bandarísku forsetakosningunum á spámannslegan hátt, eins og þeir séu einhverjir andskotans jesæjar eða habakúkar úr Gamla testamentinu. Sennilega er Bídur forseti á leiðinni í ruslatunnuna, það þarf enga spámannshæfileika til að sjá það og eyrnaskotni sperribelgurinn Trumpur, með þúsund kærur á hælunum, verður aftur forseti Bandaríkjanna. Svo verðum við bara að sjá til hvernig nýsosialistunum á Íslandi gengur að samsama sig Trumpinu, en eflaust mun það ganga eins og í sögu ef ég þekki þá rétt.

„Biden á eftir að sjá alla spilaborgina hrynja“

Athugasemdir

[Helga Dögg Sverrisdóttir, 19.7.2024 kl. 09:06]

Það er synd að sjá að fjölskylda, stjórnmálamenn og vinir skulu ekki hafa gripið inn í atburðarrásina fyrir löngu. Maðurinn er augljóslega með elliglöp og á því ekkert erindi í embættið eða aðra vinnu. Hann sér það ekki sjálfur og því nauðsynlegt fyrir aðra að grípa inn í. Synd að hann endi stjórnmálaferil sinn á þennan hátt. Hver er sinn gæfusmiður segir máltækið!