Jóhannes Ragnarsson

15.8.2024 | 21:37

Þeir sem öttu henni út á foraðið eiga að borga upp fyrirliggjandi sjóðþurrð

Þeir sem öttu fraukunni út á foraðið hljóta að borga það sem upp á vantar, andskotinn hafi það. Varla vilja þeir horfa upp á leiksopp sinn og fjölskyldu hennar borna út og eigur þeirra allar settar á uppboð og seldar hæstbjóðanda fyrir slikk? Eða er það eftir vill það sem þessir ,,velgjörðarmenn" Katrínar skemmta sér yfir þegar allt er um garð gengið? Þeir þrá eftir til vill að fá að sjá hana leidda í böndum inn á Hólmsheiði eins og hvert annað skaðræðiskvendi?

En það var aldrei að Katrín Jakobsdóttir fór í forsetaframboð. Fyrir nú utan að skíttapa fyrir alræmdri péníngaskjóðu úr Hrunmenningunni, þá blasir gjaldþrot við og sjóðþurrð. Flokkurinn sem hún hafði atvinnu af fyrir forsetafamboð er með illvíga uppdráttarsýki og að bana kominn; þeir eru þegar búnir að leggja VG, með tærnar upp í loft, inn á líknardeildina, þannig að þar er ekki feitan gölt að flá upp í tóman kosningasjóð Katrínar. Já drengir mínir, það er illa komið fyrir Katrínu og ekki laust sumstaðar við tæra og sanna þórðagleði vegna ófara hennar.

Sannast hér enn hið fornkveðna, sem sé ,,að Júdasar líkar lendi leiksbróður sínum hjá". Fátt er til bjargar og búið að skella sjóðum samherjanna í lás og setja slagbranda fyrir. Sömuleiðis eru sjóðir Valhallar Katrínu Jakobsdóttur að eilífu lokaðir. Uppboðshaldarinn er tilbúinn með hamarinn á lofti og fer nú hver að verða síðastur fyrir Katrínu að sleppa frá hildarleiknum á nærbuxunum einum fata. En ef vel vill til verður Katrín kannski ekki talin ábyrg gjörða sinna og skuldinni velt á ríkissjóð. En sumir læra aldrei að skammast sín og haga sér þindarlaust eins og fáráðlingar á landstjórnarinnar kostnað. En ballið er sem sé búið og brækurnar fullar.