Þá hefir frú Sæland fallið á léttasta prófi allra prófa. Aumingja hún.

Ekki hefði maður trúað því að frú Sæland væri svona mikill og forhertur lögbrjótur og óbótamaður eins og nú hefir eftirminnilega sannast við forkastanlega skipun hennar í Húsnæðis- og mannvirkjanefnd. Ekki einasta hefir hún svikist aftan að kynsystrum sínum á andstyggilega lúalegan hátt með því velja aðeins einn einstakling af þeirri tegund í nefndina, heldur er engu líkara en að hún hafi lagt áherslu á að fylla þessa mikilvægu nefnd af fúskurum og undirmálslýð sem ekki hefir hundsvit, hvað þá þekkingu, á húsnæði og mannvirkjum. Þessi hroðalega ákvörðun frú Sæland ráðherra hefir valdið slíku reiðarslagi í verkfræðingafélaginu að öll stjórn þess er lögst í rúmið og samkvæmt læknum horfir mjög þunglega með bata.

Hitt er auðvitað vel skiljanlegt, að ráðherra vilji umfram allt velja frændfólk og vini í þær stöður sem honum þóknast að skipa, því það er kannski ekki nema í þetta eina skifti á ævinni sem viðkomandi gegnir ráðherradómi og þá er náttúrlega um að gera að dreifa tilfallandi bitlingum á frændgarðinn, flokksfélaga og meinta vini og kunningja, jafnvel þókt allt það fólk sé samansafn af vitgrönnum þumalputtum og ófrómum lausingjalýð.

En þegar allrar skynsemi er gætt, þá átti frú Sæland, húsa og mannvirkjaráðherra, fortakslaust að leita til þeirra í Valhöllu við Háaleitisbraut og biðja þá um að útvega hæft fólk og vel þenkjandi, með heilbrigða hugsum og viðhorf, til að taka sæti í Húsnæðis- og mannvirkjanefnd, en þar á bæ eru sérfræðingar í mannaráðningum með áratuga reynslu af útdeilingu bitlinga í allar áttir. Frú Sæland féll sem sé á þessu léttasta prófi allra prófa og því ber henni að segja af sér án tafar, svo ríkið og skattþegarnir verði ekki að kosta upp á að fjarlægja hana með valdi úr ráðuneytinu.   

Skipun Ingu í stjórn HMS ekki lögmæt