Öflug vítisvél hlandsprengja

Ekki kannast virtir fræðimenn við að til sé sérstök tegund vítisvéla sem kölluð er ,,bílastæðasprengja", öðru nær. Enda var sprengjudulan við Leifsstöð aðeins venjuleg hlandsprengja af holdi og blóði. Að reyna að halda fram historíu um einhverja bílasprengju sýnir betur en flest annað hve firringin er orðin mikil og fávísleg. Venjulega eru sona morð- og eyðileggingartæki kennd upp á Rússa; Rússasprengja, Rússatungl, Rússagrýla osfrv., og þar með látið í veðri vaka að enn eina ferðina séu Rússar komnir á vettvang til að búa oss kvöl og pínu og hroðafenginn dauða í púðri og sprengjuflísum.

En hlandsprengjur geta, sem dæmi sanna, vissulega verið hættulegar líka. Í Glasgow á Skotlandi sprakk hundrað og fimmtíu og sjö sentímetra og tvöhundruð og þrjátíu kílóa hlandsprengja í samkomusal þar sem á fjórða hundrað manns var saman kominn við dans. Féllu margir í valinn og óþrifin upp um loft og veggi voru ægileg. Þá varð sá frægi atburður á matsöluhúsi í Reykjavík að vígaleg hlandsprengja, vel yfir tvöhundruð kílógrömm að þyngd, sem hafði þann starfa að skammta á diskana, rak stórutána í borðfót og skelltist í gólfið og af varð sprenging, ,,explosion" sögðu amrískir ferðamenn sem stóðu á gangstéttinni fyrir utan og fengu glerbrotaregnið yfir sig og lögðu á flótta. Aðkoman var ferleg, mannfall nokkuð, og hlandsprengjan, sem merkilegt nokk komst lífs af, var dæmd til óskilorðsbundinnar refsingar, býsna harðrar.

En þetta með ,,bílastæðissprengjuna" við Leifsstöð er auðvitað eitt endemis rugl og þvæla. Á bílastæðum verða aldrei stærri tíðindi, í mesta lagi að einhver og einhver pissi utan í mannlausan bíl eða taki sig til og kukki í hvarfi við jeppa, eða kannski upp á húddið japanskan drossíuskrjóð. En ef hlandsprengja félli, við skul um segja úr landganginum við flugvél,gætu orðið býsna miklar hamfarir. Það skulum vér öll hafa í huga.  

 

Rannsókn hafin á bílastæðasprengju við Leifsstöð

Athugasemdir

[Guðmundur Ásgeirsson, 7.7.2025 kl. 21:52]

Þetta ásamt púðursprengjunni sem var falin á salerni í flugstöðinni fyrir ekki svo löngu vekja grun um að einhver sé að "álagsprófa" viðbrögð löggæslu og viðbragðasaðila við svona löguðu. Vel þekkt er að bæði að leyniþjónustur og glæpasamtök taki upp á slíku til að kortleggja viðbúnað á stöðum sem þeir gætu síðar orðið vettvangur einhverra aðgerða. Að gera það með svona heimatilbúnu dóti sem getur ekki valdið miklum skaða en er samt nóg til að kalla á viðbrögð er þá liður í því að dulbúa aðgerðina sem tilfallandi prakkastrik þó að í raun sé um að ræða vel skipulögð verk fagmanna á þessu sviði.