Í steininn með íhöld og viðreisnarvembla

Asskoti er að heyra hvað veslings útlendingarnir eru haldnir mikilli glæpahneigð og nú eru þeir komnir í meirihluta í fangelsum á Íslandi. Það er ekki nema von að viðkvæmum blómstrum eins og henni Giljá okkar hérna og dómsmálaráðherranum, sem ekki nokkur maður man hvað heitir, en mér sagt að sé kölluð Togga Sigga, blöskri glæpaumsvif útlendinganna hér á landi. En það er til einfalt ráð við þessum vanda, ofur einfalt ráð, skilvirkt og notalegt. Já.

Vandinn, sem við er fást í tilfelli viðkvæmu blómstranna og kveikt hefir eld hneykslunar og ósjálfráðra taugauppþota í blessuðum höfunum á þeim, þ.e. að útlendingar séu komnir í meirihluta í fangelsunum, verður fljótt læknaður með því að góð tiltekt fari fram í flokkum Giljár og Toggu Siggu. Sú tiltekt mundi miða að því að koma lögum yfir og böndum á bersynduga glæpaseggi í flokkum þeirra, en nóg mun vera af slíkum röftum í þeim báðum. Á augabragði væri hægt að snúa hlutfalli íslenskra fanga okkur í vil og það svo hressilega, að einungis 5% glæpamannanna væru útlenskir.

En þá kann einhver að varpa fram þeirri spurningu hvort nokkurt pláss sé í íslenskum fangelsum fyrir alla glæpaskúnkana hjá Viðreisn og Íhaldi. Við því er líka einfalt svar. Nóg er af tómum frystihúsum um allt land eftir að kvótagreifar fóru um landið eins og engisprettufaraldur og smöluðu veiðiheimildunum saman á örfáa staði. Einnig er gnótt tómra fjárhúsa enn uppistandandi um allar sveitir. Og vér getum fullyrt, að glæpahrossum Viðreisnar og Íhalds væri ekki í kot vísað þókt þeir afplánuðu syndir sínar í yfirgefnum frystihúsum og fjárhúsum. En hvort helvítin mundu betrast við að sitja inni í fjárhúsi eða aflögðu frystihúsi vitum vér ekki með neinni vissu, en samfélagið mundi vissulega fá um hríð langþráða hvíld frá þessum stigamönnum og þorpurum. Þannig að, stúlkur mínar, hvort heldur þér heitið Giljár, Toggur eða Tuggur, það er til lausn, og í steininn nú með öll fjandans íhöld og viðreisnarvembla.

Erlendir fangar eru í meirihluta