Blekkingarleikurinn með Hjallastefnuna og braskarastéttin.

Hvað er það sem gerir þessa svokölluðu Hjallastefnu svo merkilega, að farið er að láta þetta fyrirbrigði stunda leikskólarekstur og nú grunnskólarekstur í stórum stíl? Ég hef ekki heyrt þess getið að innan Hjallastefnunnar farið nokkuð það fram sem réttlætir á einn eða neinn hátt vaxandi umsvif hennar á sviði uppeldis- og kennslu. Eða vill svo ólíklega til, að enn einu sinni hafi hjólið verið fundið upp og í þetta sinn af Margréti Pálu og Sjálfstæðisflokknum?

Ónei, Hjallastefnan er enginn frelsandi kraftaverkaboðskapur, öðru nær. Aftur á móti er Hjallastefnan eitt af þeim tækjum sem auðvaldsslektið, sem starfrækir Sjálfstæðisflokkinn, ætlar að nota til að brjóta skörð í samfélagsrekstur landsmanna í uppeldis- og skólamálum og ryðja brautina fyrir einkavæðingu skólakerfisins og gera þar með grunnnám að féþúfu braskarlýðsins. Stigamennsku af þessu tagi ber að stöðva sem fyrst með öllum tiltækum ráðum.   

Hjallastefnan opnar leik- og grunnskóla á Keflavíkurflugvelli

Athugasemdir

[Ingólfur Ásgeir Jóhannesson, 8.8.2007 kl. 21:24]

Ef um er að ræða að fólk hafi raunverulegt valfrelsi um hvers konar skóla, þá er það af hinu góða að ólíkar stefnur fái brautargengi, en ég kýs að það sé innan hins opinbera skólakerfis. Eftirspurn almennings eftir ólíkum skólum fer líklega vaxandi en það verður langt þangað til fólk kýs fremur eitthvað annað en hverfisskólann sinn, sérstaklega fyrir grunnskólana. Hjallastefnan hefur opinská markmið sem sumir skóla almenna skólakerfisins hafa ekki, ekki önnur en aðalnámskrá ríkisins segir til um.

[Níels A. Ársælsson., 8.8.2007 kl. 23:12]

Ja hérna Jói. Ég hafði ekki séð þennann vinkil.

[Ingólfur Ásgeir Jóhannesson, 9.8.2007 kl. 00:17]

http://www.hjallastefnan.is

[Óskar Helgi Helgason (IP-tala skráð) 12.8.2007 kl. 23:12]

Heill og sæll, Jóhannes !

Tek undir, með ykkur Níelsi !

Ingólfur Ásgeir, er enn einn froðusnakkurinn (svo skrifuð sé ómenguð íslenzka), af vinstri vængnum, sem tilbúinn er; að knékrjúpa fyrir niðurrifsstarfsemi Sjálfstæðisflokksins.

Er engin stjórnarandstaða í landinu, nema hinir ágætu þungavigtarmenn Frjálslynda flokksins, og við hægri menn, úti á brúninni ?

Með beztu kveðjum, úr Árnesþingi / Óskar Helgi Helgason  

[Ingólfur Ásgeir Jóhannesson, 13.8.2007 kl. 18:23]

Burtséð frá því, kæri Óskar Helgi, hvort ég er froðusnakkur (það verður að vera skoðun þín í friði!) þá held ég að ég knékrjúpi ekki fyrir Sjálfstæðisflokknum eða einkavæðingunni. Punktur. Og hér mætti kannski fara með vísu Páls H. Jónssonar er hann orti til Helga Sæmundssonar rétt upp úr 1960 eftir áður gerðar vísur sem ég kann ekki: "Ekki er Helgi húmorslaus/heldur að Árnesingar/séu með gleggri gáfnahaus/gerðir en Þingeyingar."

[Óskar Helgi Helgason (IP-tala skráð) 13.8.2007 kl. 20:46]

Heill og sæll, Jóhannes og aðrir skrifarar !

Ingólfur Ásgeir ! Þakka þér, drengilega leiðréttingu minna ummæla. Bið þig forláts, á rangri ályktunargáfu minni; og ósérplægni alla. Hygg, að þú hafir meiri vitsmuni, til meðferðar bundins máls, en ég;; kann þó einn, að mig minnir, Vestfirskan (ca. 15. öld) :

               Þekkir þú Val, bjó í Mosdal;

               auðunum stal, klippinginn

               hafði hann sér; til þvengja,

               öll skyldi Vala börnin hengja.

Ætli þessi kveðskapur hafi ekki verið ígildi þeirra Nylon stúlkna, eða annarra viðlíkra; að vinsældum, í þá daga, sé heimfært upp á nútímann; Ingólfur ?

Afsakaðu, enn og aftur lélegar skáldskapar minnis gáfur mínar; Ingólfur minn. 

Með beztu kveðjum, enn og aftur / Óskar Helgi Helgason  

[Ingólfur Ásgeir Jóhannesson, 13.8.2007 kl. 22:04]

Kvitt til þín, Óskar Helgi Árnesingur. Annars er þetta eina ferskeytlan sem ég kann, en fannst hún passa við tækifærið, og vitsmunir mínir á sviði skáldskapar þar með upp urnir. Þakka þér samsetning hinn vestfirska, hann er bráðfyndinn.