Kata, Svandís og Pétur þríhross.

Sko bara, Kata varaformaður VG bindur miklar vonir við hinn nýja meirihluta Björns Inga. Svo bætir hún við kampakát, að í raun sé þetta meirihlutasamstarf óskrifað blað!!! Sér er nú hvert andkotans blaðrið. Að það skuli vera alþingismaður og varaformaður stjórnmálaflokks, sem lætur svonalagað frá sér fara er alveg kostulegt og sannkallað aðhlátursefni. Fyrst slátraði VG í Reykjavík, með Katrínu framarlega í flokki, R-lista samstarfinu, síðan er aftur stokkið til og reynt að safna slitrunum af R-listanum saman aftur. Og til að fullkomna hundakúnstirnar eru furðupólitíkusar eins og Björn Ingi Hrafnsson og Margrét Sverrisdóttir með í uppsópinu. Og til bíta hausinn af vitleysunni, ber Svandís Svarsdóttir á borð fyrir landsmenn, að nú sé upprisinn í Reykjavík ,,félagshyggjumeirihluti" !!! Ja, litlu verður Vöggur feginn, eins og sagt er. En mér segir svo hugur um, að bræðingur Svandísar verði ekki til muna meiri félagshyggjuættar en vindurinn í görnunum á Pétri þríhrossi framkvæmdastjóra á Sviðinsvík undir Óþveginsenni. 

Katrín: Lýðræðisleg umræða að skila sér

Athugasemdir

[Óskar Helgi Helgason (IP-tala skráð) 11.10.2007 kl. 21:45]

Heill og sæll, Jóhannes; æfinlega !

Þakka þér, sem fyrr gott innleg, í þessa umræðu; um einhver furðulegustu hrossakaup samtímans.

Kom inn á þetta ótrúlega mál; á síðu minni, fyrir stundu.

Mbk., vestur undir Enni / Óskar Helgi Helgason

[Hlynur Hallsson, 12.10.2007 kl. 07:36]

Einstaka sinnum er ég sammála því sem þú skrifar Jóhannes en nú hefur þú enn og aftur dottið ofan í fúla pytt! Að Katrín Jakobsdóttir hafi verið framarlega í því að "slátra" R-lista samstarfinu er ótrúlegt bull í þér og í besta falli sögufölsun ættuð frá Samfylkingunni. Leitt að þú skulir styðja það rugl. Varst þú annars sjálfur sérstaklega hrifinn af R-listanum? Og hver hefði verið þinn óska-meirihluti í borginni? Bestu kveðjur, 

[Jóhannes Ragnarsson, 12.10.2007 kl. 13:14]

Það er nú ekki svo, Hlynur, að ég sé að bulla, eða lepja upp einhverjar sögufalsanar frá Samfylkingunni þegar ég segi að Katrín Jakobsdóttir hafi verið framarlega í flokki við slátrun R-listans. Ég hef mínar upplýsingar um það mál frá málsmetandi félögum í VG í Reykjavík og víðar og ég veit vel að þær eru á rökum reistar og rúmlega það.

Varðandi R-listann, þá var ég ekki nema í meðallagi hrifinn af honum og sá satt að segja ekki mikið eftir honum þegar hann leið undir lok.

Og um óskameirihlutann í borgarstjórn við núverandi skipan fulltrúa, sé ég engan slíkan meirihluta.