Verður borgarstyrjöld í Árnessýslu, eða mun ráðherra taka í taumana?

Þær gjörast nú tíðar ölvunar og óspektafréttirnar úr umdæmi stjörnusýslumannsins á Selfossi. Má ætla að allt sé úr böndum gengið hjá umræddum sýslumanni og upp sé runnin óöld, ef ekki skálmöld, austrí Árnessýslu. Er nú svo komið, að farinn er að læðast grunur um, jafnvel að hrekklausustu mönnum, að stjörnusýslumaður sá er þeim var fenginn frá Ísafirði hafi borið með sér þann anda að vestan sem flatlendingar í Árnessýslu kunna með engu móti að höndla. Það er samdóma álit fróðra manna, sem og sérfróðra, að baldnir drykkjurustar á Suðurnesjum séu mjög fallnir í skuggan fyrir lagsbræðrum sínum austan Hellisheiðar í tiltektum á sviði drykkjuláta, handalögmála og annarrar óyndislegrar hegðunar. Ef svo fer sem horfir, er vart langt að bíða borgarastyrjaldar í umdæmi stjörnusýslumannsins með þvaglegginn, nema dómsmálaráðherra taki sig til og frelsi árnesinga undan nærveru þessa manns og geri hann að lögreglustjóra í Svefneyjum, eða á einhverjum þeim stað öðrum sem lítil hætta stafar af því móralska andrúmslofti sem virðist eiga óðal sitt  og lögheimili undir húfu stjörnusýlumannsins með þvaglegginn.    

Vildi fá far með lögreglunni til Reykjavíkur

Athugasemdir

[Jóhannes Ragnarsson, 4.11.2007 kl. 13:50]

Það er hið versta mál ef festa og öryggi stjörnusýslumannsins með þvaglegginn hleypir öllu í bál og brand í Árnessýslu. Mætti þá frekar biðja að öryggi hans og festu verði fundinn farvegur í Svefneyjum eða á eyjunni Skrúð fyrir austan land.

[Jóhannes Ragnarsson, 4.11.2007 kl. 14:58]

Það má nú með sanni segja, að þvagleggsárás stjörnusýslumannsins á hina óheppnu konu hafi verið þörf aðgerð og þar með öðrum lögbrjótum til varnaðar. Breytir þar engu um, þó fyrrgreind þvagleggsárás sé í ætt við önnur ofbeldisverk, svo sem nauðgun. En agi verður að vera. Án aga fer allt þjóðfélagið í hund og kött. Og við skulum aldrei gleyma, að þvagleggur er mikilvægt áhald til að halda uppi aga.