Gataði dekk frelsaranum til dýrðar

Það hefur löngum verið siður mannfólksins að fagna fæðingarhátíð frelsarans með ýmsu móti; sumir klæða sig uppá og sækja guðsþjónustur, aðrir kalla Bakkus konung sér til fulltingis og láta ófriðlega. Enn aðrir stinga gat á hjóbarða lögreglubifreiða, frelsaranum til dýrðar, en þó aðallega til að ná sér niðri á smámunasömum lögregluþjónum sem af hengilmænuhætti sínum og fálkaskap láta sér sæma að skipta sér af góðglöðum ökumönnum. Ekki leist Almættinu samt betur á frelsisboðskap hins hefnigjarna útnesjamanns en svo, að hann vísaði lögreglumönnunum á hvar dólgurinn faldi sig í heldur svona vafasömu og úfnu jólaskapi. En þar sem ég er mjög kristilegur til hugans í dag, vona ég að dekkjabaninn keflvíski hafi sofið vel svefni hinna réttlátu í fangelsisherberginu. 

Sprengdi dekk á lögreglubílum

Athugasemdir

[Hilmar Bragi Bárðarson, 25.12.2007 kl. 16:22]

... og dekkjabaninn keflvíski hefur ekki íslensku sem móðurmál, heldur veltir því nú fyrir sér í huganum á rússnesku hverju hann eigi að svara lögreglunni þegar hún tekur kauða til yfirheyrslu. Já, svona er Ísland í dag. Varnarliðið farið og Rússar gera atlögu gegn lögreglunni í Keflavík.

[Jóhannes Ragnarsson, 25.12.2007 kl. 21:25]

Ja ljótt er það og lítil von um bata.

[Ingibjörg Friðriksdóttir, 25.12.2007 kl. 23:30]

Og hver ber svo ábyrgðina, ef sá keflvíski verður kvefaður á að reyna að hylja sín spor,  með því að fara úr skónum?  Ég spyr!

Hefur maður engan rétt í þessu lífi eða hvað?  Ekki einu sinni á aðfangadag jóla?  Ég er bara eitt spurningamerki???????????? 

[Jóhannes Ragnarsson, 25.12.2007 kl. 23:35]

Auðvitað ber lögreglan ábyrgðina ef maðurinn kvefast. En þeir munu reyna allt sem í þeirra valdi stendur til að hlaupast undan ábyrgðinni ef ég þekki þá rétt.