Hræsnisraus fyrrum hitlersdáta

Hann er býsna spaugsamur þessa dagana karlhrossið hann Benedikt XVI. Fyrir skemmstu flaug hann í ofboði til USA þeirra erinda að kyssa Georg Bush á nauðaberan rassinn, líklega Guði þeirra kumpána til dýrðar. Í morgun fréttist svo að hans heilagleiki hafi stokkið eins og spörfugl útá torg sánkti Péturs í Rómaborg og skipað líbanonfólki að hunskast til að hætta að rífast og drepa hvert annað. Auðvitað veit gamli hitlersæskuunginn hvað hann syngur þegar stríðslæti eru annarsvegar. Enda hafa fáir páfar getað státað sig af því að hafa barist undir merkjum Adólfs sáluga meðan hann var og hét. Að vísu þykist stórvinur Bush, Benedikt XVI, hafa stokið úr her Hitlers á ögurstund, en það sögðust líka allir hafa gert eftir að stríðið var tapað þó að þeir hafi barsist blóðugir uppað eyrum fram á síðustu stundu.

Friðarhjal ódáma á borð við Benedikt XVI, Georg Bush, Kondomlessu Ræs og annarra af sama sauðahúsi, er í senn ógeðfellt og hræsnisfullt með afbrigðum og álíka trúverðugt og að halda því fram fálkinn sé hættur að éta rjúpur en þess í stað farinn að vernda þann saklausa fugl með kjafti og klóm.

Páfi hvetur til friðar í Líbanon

Athugasemdir

[Þórdís Bára Hannesdóttir, 11.5.2008 kl. 18:17]

Nenni sjaldan að lesa blogg nema þín stundum því þú ert svo skemmtilegur og gáfaður oft. Verð að segja að mér finnst ljótt að núa páfanum því um nasir að hann hafi tilheyrt Hitlersæskunni. Hann var barn síns tíma og réð engu um þá vist. Hvað sem annað má um hann segja. Sá nefnilega heimildarmynd um Hitlersæskuna fyrir einhverju síðan þess vegna segi ég þetta.

[Jóhannes Ragnarsson, 11.5.2008 kl. 19:42]

Ég tek því sem sjálfsögðum og eðlilegum hlut, að ég sé skammaður fyrir að fara lítilsvirðingarorðum um páfann. En satt að segja þykir mér halurinn heldur í skuggalegra lagi og uppátæki hans að halda til Bandaríkjanna á fund Georgs forseta var afskaplega einkennilegt tiltæki. Um hitleríska fortíð Benedikts XVI er svo sem lítið hægt að fullyrða annað en að hann var sannarlega soldáti í þýska hernum í síðari heimstyrjöldinni og varla nokkuð við það að athuga þó karlinn vilji sverja þann hermennskuferil af sér, sem og veru sína í hitlersæskunni.

Kaþólska kirkjan sjálf á skuggalega fortíð, svo ekki sé meira sagt. Lengi hefur leikið sterkur grunur á að hún hafi leikið tveimur skjöldum í afstöðu sinni til nasismans á sínum tíma. M.a. er talið að þessi valdasjúka trúarstofnun hafi skotið skjólshúsi yfir ýmsa skuggabaldra úr búri Adólfs Hitlers og hjálpað þeim til að sleppa úr klóm sigurvegara styrjaldarinnar.

[Þórdís Bára Hannesdóttir, 11.5.2008 kl. 20:50]

Vissi svosem að þú myndir ekki verða orðlaus.

Ég veit ekkert um hans hermennsku eða hvor hann vildi sverja hana af sér. En var ekki herskylda? Já það er spilling allstaðar þar sem maðurinn kemur nálægt.