Illa skrifandi aðilar

Heldur óskemmtilegur fréttpistill atarna og svo frámunalega illa skrifaður, að undrum sætir. Það er t.d. óborganlegt að verða vitni að, hvernig sá er pistilinn ritaði, notar orðið, eða öllu heldur hortittinn, ,,aðili" af mikilli kunnáttu og fimi.

Ég er þeirrar skoðunar, að jafn virðingarverður ,,aðili" og Morgunblaðið, ætti að taka hressilega í hnakkadrambið á þeim kauðum og bögubósum, sem sjá um að skrifa fréttir inná vefsíðu blaðsins, mbl.is, og kenna þeim undirstöðuatriði í ritun íslensks máls, m.a. notkun bæði á ,,aðila" og ,,aðilum" og þá ekki síst ofnotkun á slíku orðskrípi og öðrum ámóta gerpum. Annað er ekki við hæfi.   

Seinheppinn þjófur á Akureyri

Athugasemdir

[Haraldur Bjarnason, 6.7.2008 kl. 21:09]

Aðili er hortittur sem ekki á vera til neins staðar í rituðu máli eða mæltu. Sammála þér um þetta Jói. Þessi frétt er eitt allsherjar klúður og líklega bara tekin orðrétt frá löggunni. Dagbækur löggunnar og skrif lögfræðinga yfirleitt eru uppfull af svona hortittum.

[Ingibjörg Friðriksdóttir, 6.7.2008 kl. 23:08]

En eiga þá hortittirnir ekki að vera innan gæsalappa, „hortittir“

Blaðamenn eiga auðvitað að vera færir um að færa í stílinn, en það er ofboðslega gaman að lesa sumt sem lögfræðingar, lögreglan svo ég tali nú ekki um stjórnmálamenn skrifa, áður en sérfræðingar prófarkalesarar) fara um það höndum.

[Ásthildur Cesil Þórðardóttir, 7.7.2008 kl. 14:25]

Held að þessi ágæti maður ætti að fá sér annað starf.