Helvítismatur og þorpari

Það var þokkalegur fjandi að hleypa öðrum eins helvítismat og þorparanum Róman Abramovíjts inn í eina saklausa Langholtskirkju. Úr því sem komið er, er ekki um annað að ræða, en að treysta á að herra Byskubinn, Karl Sigurbjörnsson, grípi tafarlaust til viðeigandi ráða til bjargar Langholtskirkju. En það er ekki hrist framúr erminni að bjarga guðshúsi eftir aðra eins vanhelgun og raun ber vitni, svo það endi ekki sem hverfisknæpa eða hamborgarabúlla. Ef Byskubinn hefði vitað fyrirfram, að sá háskalegi mammonsþjónn Róman hefði í hyggju að smygla sér inn á tónleika Bjarkar í Laugarásnum, hefði hann náttúrlega farið að dæmi meistarans frá Nasaret, velt um bekkjum og borðum í Laugaráskirkju áður en tóleikarnir hófust, rekið útsendara hins illa út úr helgidóminum og komið honum fyrir í grjóturð niður við Kleppsvík. En hafi herra Karl vitað af sendingunni, en ekkert aðhafst, lítur málið verulega illa út og fátt annað í stöðunni en að selja kirkjuna undir einhvern arðvænlegan atvinnurekstur.    

Góð stemning hjá Björk

Athugasemdir

[Sigurður Þorsteinsson, 26.8.2008 kl. 21:39]

Róman Abramovítsj er eins og alþjóð veit í sérstöku dálæti hjá verkalýðs og kommúnistaforingjanum Vladimír Pútin forseta Rússlands. Abramovítsj og Pútin eru báðir komnir á hið ,,guðlega" stig kommúnismans að vera orðnir ,,jafnari en aðrir". Ef Jóhannes vill að Abramovítsj  útsendari hins illa verði rekinn út úr helgidóminum og honum komið fyrir í grjóturð niður við Kleppsvík verður að taka einn úr Ólafsvíkinni með honum. Þið gætuð þá stofnað aðdáandaklúbb Chelsea, þorpararnir Abramovítsj og Jóhannes.

[Jóhannes Ragnarsson, 26.8.2008 kl. 21:52]

Guð almáttugur fyrirgefi þér orðbragðið, Sigurður minn. Þú veist það svo vel sjálfur, að mér byrjar fagurt umtal og sætlegt, en ekki illa grundaður talsmáti og ljótur.

[Sigurður Þorsteinsson, 28.8.2008 kl. 06:21]