Stjörnusýslumaðurinn Stones láti kné fylgja kviði

Það er varla að maður trúi því að það ríki vargöld með tilheyrandi ofbeldi í Fjölbrautaskóla Suðurlands á Selfossi, svo að segja onaní hálsmálinu á stjörnusýslumanninum Stones, sem er eitt hið ágætasta yfirvald hér á landi. En það mátti svosem búast við slíkum býsnum; erfðagen þeirra Njálssona frá Begþóhváli, Gunnars á Hlíðarenda og Sigurðar Gottvinssonar hafa löngum verið sterk á Suðurlandi og skjóta fyrirvaralaust upp kollinum af slíkum fítonskrafti að jafnvel vöskustu yfirvöld fá ekki við ráðið.

En þegar þvílík vá ber að dyrum menntaverksmiðju sem hefur með höndum að verka unglingskvikindi uppí nýtilegt fólk, verður að bregðast við á viðeigandi hátt. Ég geri ráð fyrir stjörnusýslumaðurinn Stones muni láta höndur standa vel fram úr ermum og láti kné fylgja kviði og ráðist með alvæpni, ásamt hersveit sinni, til inngöngu í Fjölbrautaskóla Suðurlands og svæli alla ofbeldismelrakka, sem þar hafast við, út úr húsi og reki þá til fjalla eins og sauðpéning á afrétt.

Ráðist með grjóti á 16 ára pilt í FSu á Selfossi

Athugasemdir

[Hlynur Jón Michelsen, 21.2.2009 kl. 02:04]

Ef hann má vera að því vegna anna við að sekta unga ökumenn fyrir að henda hálfétnum pilsum út um bílglugga, þá ætti hann allavega að geta notað mannskapinn sem hann ætlaði að láta handtaka alla skuldara suðurlands, til að hreinsa til í kringum sig.

[Hafsteinn Viðar Ásgeirsson, 22.2.2009 kl. 19:33]

Hann gerir ekkert karlinn, nema það komi honum í viðtal einhversstaðar. Hélt reyndar að þetta væri svoleiðis mál...?