Grenjuskjóður og frekjudollur sýna af sér moldarkofafordild

Ekkisens moldarkofafoldild er það af þingmannsnefnunum að ganga ekki eins og menn í að hækka hjá sér launin. Að banna sjálfum sér að bjarga sér, er skammarleg ómennska og engum til eftirbreytni.

En þessi vesaldómur ætti svo sem ekki að koma neinum á óvart. Í morgun hjó ég eftir í útvarpinu, að ástandið í þinginu væri svo hræðilegt, að iðulega væru þingmenn grátandi undan hverjum öðrum. Þessi ósköp voru, að ég held, höfð eftir hipp og kúl-kerlingunni, Birgittu Jónsdóttur, sem kunn er fyrir flest annað en kalla allt ömmu sína.

Ef það er rétt, að stór hluti alþingismanna séu grenjuskjóður og vælukjóar, er einungis við vondu að búast. Og þegar við bætist, að umræddar grenjuskjóður eru í þokkabót hamslausar frekjudollur, er útlitið sannarlega svart.

Manni hreinlega fallast hendur gagnvart þessum sí-grenjandi þokkafénaði, ódöngun hans og uppskafningslátum.

Banna launahækkun þingmanna

Athugasemdir

[Baldur Hermannsson, 20.12.2009 kl. 13:17]

Ljótt er ef satt er. Þessi óbermi virðast ófær um að stýra þjóðinni til betri lífskjara en það er þó lágmark að þeir lagi sín eigin kjör fyrst.

En hver er grenjuskjóðan á myndinni? Ef hún væri ekki svona vel hærð myndi ég halda að þetta væri Solla.

[Jóhannes Ragnarsson, 20.12.2009 kl. 13:29]

Nú, ég bað starfsmann á skrifstofu Alþingis að senda mér mynd af dæmigerðum nútímaþingmanni og fékk þetta skilirí til baka, án nafns eða kennitölu. Það má vera að þetta sé Solla, en þetta gæti líka verið tengdasonur Flateyrar.

[Baldur Hermannsson, 20.12.2009 kl. 13:42]

Já þetta gæti verið frændi.