Verkalýðshreyfing í gíslingu óæskilegra afla

Við skulum ekki ganga að því gruflandi að VR er fyrst og fremst hluti af valdabatteríi Sjálfstæðisflokksins og þar af leiðandi alls óskylt öllu sem heitir verkalýðsbarátta, hvað þá stéttarbarátta. Það er því mjög mikilvægt fyrir Sjálfstæðisflokkinn að glata ekki því kverkataki sem hann hefur á verkalýðshreyfingunni gegnum VR.

Auðvitað er nauðsynlegt að koma stjórn VR frá. En það á líka við stjórnir fjölmargra annarra stéttarfélaga. Það er því miður staðreynd, að hin almenna verkalýðshreyfing er í harðri gíslingu tiltölulega lítils hóps fólks sem er samdauna valdaklíkunni í landinu, fólks sem spilaði ræla og valsa á fiðlur meðan frjálshyggjueldarnir brunnu. Og eftir að frjálshyggjukapítalismin hrundi ofan í þann skítapytt sem hann var byggður yfir hafa verkalýðsforingjarnir þagað eins og klumsa merar. Ekki hafa þessir delar slegist í hópinn með fólkinu sem krefst uppgjörs við gjörspillta burgeisstétt og vill byggja upp nýtt þjóðfélag í anda jöfnuðar og heiðarleika. Nei, Gylfi Arnbörnsson og Gunnar Páll Pálsson hafa verið víðsfjarri þeim vettvangi, enda er þeim þjónkun við ríkjandi vald auðs og ójöfnuðar kærara en að fylkja liði með alþýðu manna.

Í öllu því umróti sem á sér stað á Íslandi um þessar mundir hljóta böndin fyrr eða síðar berast að verkalýðshreyfingunni. Þar verður að hreinsa út svo um munar; frelsa hreyfingu launafólks úr gíslingu hugsjónalausra varðhundum vissra stjórnmálaflokka og þess sem þeir standa fyrir.

Það verður að hefja baráttu fyrir Frjálsri Verkalýðshreyfingu samhliða baráttunni gegn gjörspilltu ríkisvaldi, stjórnmálaflokkum og peningageðsjúklingum.

 

Stjórn VR langþreytt á rangfærslum

Kögunar-pilturinn tístir í tittlingaborg

Sko litla Kögunar-piltinn, sem þekkir ekki Finn Ingólfsson og hefur aldrei heyrt á hann minnst, hann er alveg standandi bet á að ríkisstjórnin hafi ekki tekið af skarið og hjólað eins og trylltur hani í Bretana út af hryðjuverkalögunum góðu. Við hverjum fjáranum bjóst Kögunar-drengurinn? Átti hann von á að Hordi og I. Sól tækju sig til og færu með vopnavaldi á hendur ríkisstjórn hennar hátignar Elísbetar II? Eða er hann bara að gera sig digrann vegna formannskosningarinnar hjá hinni elliæru Framsóknarmaddömu? Ja, þá er bragð að þegar fer að tísta í tilttlingaborg ...

Til fróðleiks er rétt að nefna að orðatiltækið, ,,að nú tísti í tittlingaborg" er haft um syfjaða staula sem reyna að vinna sér inn prik með klunnalegu kjaftbrúki og innantómu.  

Fresturinn að renna út

Errilegur mannskapsmaður Láfi Klemm

Helvíti errilegur mannskapsmaður þessi Láfi Klemm og til í tuskið, enda hámenntaður áskrifandi að launum hjá Seðlabanka Íslands. En eitthvað hafa vondir straumar hrært uppí höfðinu á karlálftinni, þegar han gekk fram á hugsandi fólk á Austurvelli á gamlársdag, og komið honum í sannkallað baráttuskap. Það er svo sem vel skiljanlegt, að menn sem í áraraðir hafa nagað og étið blýanta og auk þess horft uppá kapítalismann hrynja og verða að illþefjandi skítaklessu á pappírum Seðlabankans, verði dálítið ruglaðir í rýminu þegar þeir ganga óforvandis í fangið á æstum kommúnistum og öðru óráðvöndu illþýði.

Kappinn Pétur Hoffmann Salómonsson barðist berhentur við átján manns og hafði betur, en Láfi Klemm, hagfræðingur í Seðlabankanum, ætlaði að hjóla í fimmhundruð menn í þeirri hagfræðilegu fullvissu að hann gæti rotað þá alla á augabragði. Segið þið svo að ekki séu enn garpar uppi meðal þjóðar vorrar. 

Taldi sér ógnað

Stjáni Torgerðar hefði átt að vinna

Ég er mest hissa á að Kristján Arason, eiginmaður Torgerðar kínafara, skuli ekki hafa hlotið nafnbótina ,,íþróttamaður ársins 2008" fyrir stórbrotinn árangur sinn í Kaupþingsmaraþoninu.

Ólafur Stefánsson íþróttamaður ársins 2008

Kominn til Reykjavíkur til að mótmæla auðvaldsmafíunni

Í dag settist ég upp í bifreið mína, heilsuveila og marrandi, og ók sem leið liggur frá heimkynnum mínum í Ólafsvík og til Reykjavíkur þeirra erinda að mæta á mótmælafund á Austurvelli klukkan 15:00 á morgun.

Ég er firnavel undirbúinn fyrir sannkallaðann baráttufund, með fimm kassa af kjarngóðu baráttugóssi í farangursgeymslunni, sem ætti að duga til að stökkva mörgum ríkisstjórnum á beljandi flótta. Það er því skynsamlegast fyrir brúnstakka auðvaldsmafíunnar að láta sem minnst fyrir sér fara meðan ég staldra við í miðborg Reykjavíkur.

Mótmælt á Austurvelli á morgun

50 árum síðar ... upphaf byltingar á Íslandi

Fimmtíu árum eftir byltinguna á Kúbu rambar annað eyland, Ísland, á barmi byltingar eftir að gjörspilltri elítu stjónmála- og peningageðsjúklinga, andlegum bræðrum Baptista, tókst að teyma landið fyrir björg kapítalismans.

Úr því sem komið er, hlýtur sósíalísk bylting í anda félaga Fídel og Che að koma sterklega til greina á Íslandi.

Lifi félagi Fídel og byltingin á Kúbu!

 

50 ára byltingarafmæli á Kúbu

Ríkisstjórnarútvarp allra landsmanna

Hádegisútvarp RÚV hóf nýtt ár með kynlegum fréttaflutningi af mótmælum við Hótel Borg sem fyrstu frétt. Þar var byrjað á að ljúga því blákalt að mótmælendur hefðu verið 200 og þar á eftir fékk Ari Edvald vaða einhliða elginn fyrir hönd Jóns Ásgeirs, útrásarvíkingana, fjárglæframannanna og ríkisstjórnarinnar, algjörlega gagnrýnislaust af hálfu fréttamanns útvarps allra landsmanna. Í hverju var tjónið, sem fyrirtæki Jóns Ásgeirs varð fyrir við Hótel Borg, fólgið og Ari Edvald, senditík Jóns Ásgeirs, segir að hafi hlaupið á einhverjum milljónum í krónum talið? Ekki eitt orð um það, enda spurði fréttamaðurinn einskis í þá átt. Og ekki datt hinum sauðheimska fréttamanni í hug að spyrja senditíkina hvort hún væri í raun og veru að biðja um fasískar lögregluaðgerðir þegar hún skammaðist útaf linkind lögreglunnar gagnvart fólki sem tjáir sig með mótmælaaðgerðum.   

Ég hef svo sem verið meðvitaður um, nokkuð lengi, að Ríkisútvarpið er fyrst og fremst fjölmiðill undir hæl valdhafa, auðvalds og ríkisstjórnar, en ekki hlutlaus, lifandi fjölmiðill fólksins í landinu, fólksins sem á og rekur RÚV. Slíkur fjölmiðill er að sjálfsögðu ekki trúverðugur, ekki fremur en fjölmiðlar Jóns Ásgeirs.

Ef Ríkisútvarpið ætlar að halda áfram á sömu braut mun ekki líða á löngu þar til það fær heimsókn fólks í mótmælahug.

Þremenningunum sleppt