Vanmetakvikindi, sem ekki eru í húsum hæf

Það er alveg furðulegt að tengdaforeldrar mesta ástarbrands golfíþróttarinnar virðast ekki sjá sóma sinn í því að gleðjst opinberlega vegna afreka tengdasonarins á samræðisfýsnarvellinum. Þetta vanþakkláta fólk má þakka fyrir tillitssemi tengdasonarins að láta aðrar konur bera hluta byrðanna, sem ella hvíldu allar á herðum Elínar Tómásdóttur Norðgren, en engin kona myndi standa undir slíku álagi nema í hæsta lagi í þrjá til fjóra daga.

En nú hefur Tígur karlanginn Woods (Skógartígirsdýrið) mátt þola að ganga í gegnum ruddafengna meðferð undir styrkri handleiðslu fagmanna sem hafa sérhæft sig í að sarga gredduna úr alræmdum saurlífisdólgum af öllum kynjum. Það á svo eftir að koma í ljós hvernig til hefur tekist í tilfelli Tígursins, hvort allt miðvígstöðvafjör kappans hefur fjarað útaf honum fyrir fullt og allt, eða hvort lostabálið tekur sig upp, jafnvel af tvíelleftum krafti.

En tengdaforeldrar Tígurs eru óuppdregin vanmetakvikindi og ekki í húsum hæf, - alls ekki í húsum hæf. Já.

Tengdaforeldrarnir tjá sig ekki

Athugasemdir

[Sveinn Elías Hansson, 19.2.2010 kl. 22:53]

Væntanlega skortir ekki fé á þessu heimili lengur,eða hvað?

Skógargreddutígurinn hefur séð fyrir því, og þau ekkert nema vanþakklætið.

[Jóhannes Ragnarsson, 19.2.2010 kl. 23:02]

Svei mér þá ef snörp rassskelling er ekki of mild hegning fyrir svona trénaða tengdaforeldra. Ef einhver alvöru döngun væri til staðar hjá Tígurnum myndi hann láta golfkylfuna, þessa með stóra hausinn, vaða í afturendann á þessum leiðindahjúum.