Hrunverjar og Hrungil - Tækifæri aldarinnar farið forgörðum?

Það hefði verið ráð að koma Efnahags-Hrunverjunum okkar, helst gjörvöllum Sjálfstæðisflokknum, fyrir á botni Hrungils áður en hraunið fór að flæða þar ofaní. En eins og flestir vita, þá var draugmori alskonar, púkastóð og illum sendingum gjarnan komið fyrir undir malarbingjum og stórum steinum eftir að búið var að kveða illþýðið niður, eins og kallað var.

Ef ríkisstjórnin hefði haft kvarnirnar í lagi í gærmorgun, hefði hún vitanlega brugðist hart við þegar fréttist af gosinu og látið flytja hrunskallana- og kellingarnar í snarhasti austrí Hrungil og búið þannig um hnútana að hin íslenska þjóð þurfi eftirleiðis aldrei að óttast að ræningjalýðurinn mikli, hrunsskrímslin, láti á sér kræla meir. En því miður, lítur út fyrir að þetta mikla tækifæri til að afmá peninggræðgisdraugana sé runnið út í sandinn, - að minnsta kosti í bili. 

Hraunflæði niður í Hrunaárgil

Athugasemdir

[corvus corax, 22.3.2010 kl. 14:52]

Tvær léttar spurningar: Hvaða jökull er norðan við Heljarkamb? Og hin spurningin: Hvar er þessi Goðastein? Ég hélt að til væri Guðnasteinn í Eyjafjallajökli sunnanverðum en hef aldrei heyrt um Goðastein þar ...hvar er hann annars?

[Jóhannes Ragnarsson, 22.3.2010 kl. 15:06]

Því miður er ég afar ókunnugur þarna á Suðurlandinu, hef t.d. aldrei áður heyrt minnst á Heljarkamb né Hrungil, hvað þá Goðastein eða Guðnastein. Má vera að steinn þessi hafi heitið Goðasteinn fyrir kristnitöku, en sannkristnir menn breytt nafninu í Guðnastein. Að þessi bölvaði hnullungur heiti eftir Guðna Ágústssyni, þykir mér ólíklegt, þar eð sá Guðni var líkari vélarvana skipi á reki í stórsjó í sinni pólitík, meðan Halldór Ásgrímsson var sannarelega ,,kletturinn í hafinu" meðan hans naut við sem ráðsmanns Framsókanarmaddömunnar.

[corvus corax, 22.3.2010 kl. 15:42]

Sá klettur er sem betur fer sokkinn!

[Níels A. Ársælsson., 22.3.2010 kl. 18:27]

Þetta er ekkert of seint.

Katla kýs bráðum svo verðum við öllu búnir þá !

[Níels A. Ársælsson., 22.3.2010 kl. 18:29]

"gýs" ............

Setjum planið inn á viðbragðsáætlun Almannavarna.

[Einar Steinsson, 22.3.2010 kl. 20:56]

Guðnasteinn og Goðasteinn eru báðir á svipuðum slóðum í jöklinum en það eru mjög deildar meiningar um það hvor er hvað og nöfnunum stöðugt ruglað saman. Ég efast um að nokkur viti með fullri vissu hvor er Guðnasteinn og hvor er Goðasteinn.

Og nú kemur JR og snýr einhvern vegin út úr þessu "alvarlega" innleggi :)